પાટણ જિલ્લાના ચાણસ્મા તાલુકાના દેલમાલ ગામમાં 'શિવાય ઇન્ફોટેક' નામની ઝેરોક્ષની દુકાનની આડમાં ચાલતા નકલી ચલણી નોટો છાપવાના એક બહુ મોટા કૌભાંડનો એલસીબી પોલીસે પર્દાફાશ કર્યો છે. પોલીસે સ્થળ પરથી 500 રૂપિયાની કુલ 492 નકલી નોટો અને પ્રિન્ટિંગના હથિયારો સાથે બે શખ્સોને દબોચી લીધા છે.
પાટણ પોલીસને મળેલી ચોક્કસ બાતમીના આધારે એલસીબીની ટીમે ચાણસ્મા પોલીસ અને એફએસએલ અધિકારીઓની હાજરીમાં દેલમાલ ગામે આવેલી આ દુકાન પર મધરાત્રે ત્રાટકી હતી. તપાસ દરમિયાન ખુલાસો થયો કે અહીં કોમ્પ્યુટર અને કલર પ્રિન્ટરની મદદથી હૂબહૂ ભારતીય ચલણ જેવી નોટો છાપી દેશના અર્થતંત્રને મોટું નુકસાન પહોંચાડવાનું પાપ થતું હતું. પોલીસે સ્થળ પરથી નકલી નોટો ઉપરાંત પ્રિન્ટર, કોમ્પ્યુટર, શાહી, A4 સાઇઝના કાગળ, પ્રિન્ટ કરેલી શીટ અને મોબાઈલ-મોટરસાયકલ સહિત કુલ અંદાજે રૂ. ૧.૦૧ લાખનો મુદ્દામાલ જપ્ત કર્યો છે. પોલીસે દેલમાલના નિકુલજી હમીરજી ઠાકોર અને એક સગીરની ધરપકડ કરી છે, જ્યારે ધીરજ ચૌહાણ, કૈલાશ અને પપ્પુ ઠાકોર નામના ત્રણ આરોપીઓ હાલ ફરાર છે.
પ્રાથમિક પૂછપરછમાં સામે આવ્યું છે કે આરોપીઓ અગાઉ દિલ્હીમાં એક આંગણિયા પેઢીમાં કામ કરતા હતા, જ્યાં કેટલાક ઇસમોના સંપર્કથી નકલી નોટોની ડિમાન્ડ ઊભી થઈ હતી. આ નકલી નોટો છાપીને દિલ્હીની આંગણિયા પેઢી સુધી પહોંચાડવાની આખી ખતરનાક યોજના હતી. પાટણ પોલીસ હવે આ રેકેટ કેટલા સમયથી ચાલતું હતું અને બજારમાં કેટલી નોટો ઘુસાડી દેવાઈ છે, તે દિશામાં ઘનિષ્ઠ તપાસ કરી રહી છે.
