સિદ્ધપુર તાલુકાના મૂડવાડા ગામ તળાવ માં ચાલી રહેલા ગેરકાયદેસર ખનન પર પાટણ ખાણખનીજ વિભાગે રેડ કરી એક લોડર અને પાંચ ટ્રેક્ટર જપ્ત કર્યા છે.
મૂડવાડા ગામના તળાવ વિસ્તારમાં નિયમોનો ભંગ કરીને માટી નું ગેરકાયદેસર ખનન થતું હોવાની તંત્રને ફરિયાદ મળતાં ખાણ ખનીજ વિભાગની ટીમે તાત્કાલિક સ્થળ પર પહોંચી કાર્યવાહી હાથ ધરી હતી.અચાનક રેડ પડતા સ્થળ પર દોડધામ મચી ગઈ હતી.ખનન માટે ઉપયોગમાં લેવાતા વાહનો સ્થળ પર જોવા મળતા ટીમે એક લોડર અને પાંચ ટ્રેક્ટર કબજે કર્યા હતા. જપ્ત કરાયેલા તમામ વાહનોને કાકોશી પોલીસ મથક ખાતે રાખવામાં આવ્યા હતા.
મદદનીશ ભૂસ્તર શાસ્ત્રી મહર્ષિ વ્યાસે જણાવ્યું હતું કે. ફરિયાદ આધારે રેડ કરી પાંચ ટ્રેક્ટર અને એક લોડર જપ્ત કરવામાં આવ્યા છે. સ્થળ પર થયેલ ખોદકામની માપણી કરાઈ છે.હવે તેના આધારે નકશો તૈયાર કરી જવાબદારો સામે દંડાત્મક કાર્યવાહી કરાશે.
