સાંતલપુર તાલુકાના લોદરા ગામ નજીક પાણી પુરવઠા વિભાગની ટીમ પર હુમલાની ગંભીર ઘટના સામે આવી છે. ખાનગી હોટલમાં ગેરકાયદેસર પાણી કનેક્શનની ફરિયાદના આધારે કાર્યવાહી કરવા ગયેલી પાણી પુરવઠા ની ટીમને વિરોધનો સામનો કરવો પડ્યો હતો જયારે સરપંચના પુત્ર અને ભાઈએ પાણી પુરવઠા વિભાગના અધિકારી ઉપર હીંચકારો હુમલો કર્યો હતો. આરોપ છે કે લોદરા ગામના સરપંચના ભાઈ અને પુત્રએ અધિકારીઓ સાથે ઉગ્ર વર્તન કરી હુમલો કર્યો હતો.
ચોંકાવનારી બાબત એ છે કે ઘટના દરમિયાન પોલીસ હાજર હોવા છતાં સરપંચના પુત્ર અને ભાઈએ અધિકારી ઉપર હુમલો કર્યો હોવાનું સામે આવ્યું છે. હુમલામાં પાણી પુરવઠા વિભાગના અધિકારીને ઈજા પહોંચી હોવાનું જાણવા મળ્યું છે.સરકારી કામગીરીમાં અવરોધ અને અધિકારી પર હુમલાની ઘટનાએ તંત્રમાં ભારે રોષ ફેલાવ્યો છે. નાયબ કાર્યપાલક ઇજનેરે જવાબદારો સામે કડક કાર્યવાહી માટે પોલીસ સ્ટેશનમાં ફરિયાદ નોંધાવવાની પ્રક્રિયા હાથ ધરી હોવાનું જાણવા મળ્યું છે.સરકારી અધિકારીઓની સુરક્ષા અને કાયદો-વ્યવસ્થાને લઈને ઘટનાએ અનેક ગંભીર સવાલો ઉભા કર્યા છે.
