બનાસકાંઠામાં UGVCL ની બેદરકારીનો વધુ એક કિસ્સો સામે આવ્યો છે. ચિત્રાસણી ગામના એક વીજ ગ્રાહકને વપરાશ વિના જ લાખો રૂપિયાનું વીજબિલ ફટકારાતા ગ્રાહક ચિંતામાં મુકાયો છે. સામાન્ય રીતે દર મહિને 200 થી 300 રૂપિયા બિલ આવતું હોવા છતાં આ વખતે સીધું 1 લાખ 6 હજાર 843 રૂપિયાનું બિલ આવતા સમગ્ર પરિવારનો જીવ તાળવે ચોટયો છે.
પાલનપુર તાલુકાના ચિત્રાસણી ગામમાં રહેતા આંજણા રામા ભાઈ અભાભાઈને UGVCL તરફથી મોબાઈલમાં વીજબિલ નો મેસેજ મળ્યો હતો. મેસેજમાં 1 લાખ 6 હજાર 843 રૂપિયાનું બિલ દર્શાવતા પરિવાર ચિંતામાં મુકાઈ ગયો હતો. ગ્રાહકના જણાવ્યા મુજબ તેઓ વર્ષોથી ખેતરમાં રહે છે અને ગામમાં આવેલ મકાનમાં કોઈ રહેતું નથી. જેથી વીજ વપરાશ ખૂબ જ ઓછો થતો હતો અને દર વખતે માત્ર 200 થી 300 રૂપિયાનું બિલ આવતું હતું. પરંતુ આ વખતે મીટરનું વાસ્તવિક રીડિંગ આશરે 3100 યુનિટ હોવા છતાં બિલમાં 17 હજાર યુનિટ દર્શાવવામાં આવ્યા હોવાનો આક્ષેપ દિનેશભાઇ રામાભાઈ ચૌધરીએ કર્યો હતો.
UGVCLની આ ગંભીર ભૂલને લઈને ગ્રાહકે ઇકબાલગઢ UGVCL કચેરીએ પહોંચીને રજૂઆત કરી બિલમાં સુધારો કરવાની માંગ કરી છે. જોકે, ઉત્તર ગુજરાત વીજ કંપનીની બેદરકારીને લઈને હાલ તો વીજ ધારકના પરિવારનો જીવ પડીકે બંધાયો છે.
