પાલનપુરથી ખેમાણા ટોલ નાકા સુધી યોજાયેલી રેલી દ્વારા નશા મુક્ત સમાજનો સંદેશ
આંતરરાષ્ટ્રીય ડ્રગ નિષેધ અને ગેરકાયદેસર તસ્કરી વિરોધી દિવસ નિમિત્તે બનાસકાંઠા જિલ્લા પોલીસ દ્વારા યુવાધનને નશાના દૂષણથી દૂર રાખવા તેમજ સમાજમાં જનજાગૃતિ ફેલાવવાના હેતુથી ભવ્ય સાયકલોથોનનું આયોજન કરવામાં આવ્યું હતું.
બનાસકાંઠા જિલ્લા પોલીસ અધિક્ષક.પ્રશાંત સુંબેના માર્ગદર્શન હેઠળ યોજાયેલા આ જાગૃતિ અભિયાન અંતર્ગત પાલનપુર પોલીસ હેડ ક્વાર્ટર ખાતેથી સાયકલ રેલીને પ્રસ્થાન કરાવવામાં આવ્યું હતું. રેલી ખેમાણા ટોલનાકા સુધી પહોંચી હતી, જેમાં મોટી સંખ્યામાં પોલીસ અધિકારીઓ, કર્મચારીઓ, યુવાનો અને નાગરિકોએ ઉત્સાહપૂર્વક ભાગ લીધો હતો.
રેલી દરમિયાન નશા વિરોધી બેનરો અને સૂત્રોચ્ચારો દ્વારા લોકોને ડ્રગ્સના દૂષણથી દૂર રહેવા તેમજ સ્વસ્થ અને વ્યસનમુક્ત જીવન જીવવા માટે પ્રેરિત કરવામાં આવ્યા હતા. પોલીસ દ્વારા "ડ્રગ્સ મુક્ત બનાસકાંઠા"ના સંકલ્પ સાથે સમાજમાં સકારાત્મક સંદેશ પહોંચાડવાનો પ્રયાસ કરવામાં આવ્યો હતો.
