મહેસાણા લોકલ ક્રાઈમ બ્રાન્ચ (LCB) દ્વારા ગુજરાતના દારૂબંધીના કાયદાને સાર્થક કરતી એક સઘન કાર્યવાહી કરવામાં આવી છે. ચોક્કસ બાતમીના આધારે પોલીસે ઊંઝા તાલુકાના મક્તુપુર હાઇવે પરથી એક શંકાસ્પદ ટ્રકને આંતરીને તપાસ કરતા તેમાંથી વિદેશી દારૂની ૯૭૪ પેટીઓ જપ્ત કરી છે. આ જથ્થામાં કુલ ૪૧,૬૭૬ જેટલી દારૂની બોટલો મળી આવી છે, જેને રાજ્યમાં ગેરકાયદેસર રીતે વેચવાના ઇરાદાથી ઘુસાડવામાં આવી રહી હતી.
દારૂની આ ગેરકાયદેસર હેરાફેરી માટે બુટલેગરોએ એક ચાલાકીભરી તરકીબ અપનાવી હતી. ટ્રકમાં રહેલી દારૂની પેટીઓને કાળી માટીથી ભરેલા કોથળાઓની આડમાં એવી રીતે સંતાડવામાં આવી હતી કે સામાન્ય નજરે જોનારને તે માત્ર માલવાહક વાહન જ લાગે અને પોલીસને પણ થાપ આપી શકાય. જોકે, LCBની સતર્કતા અને ઝીણવટભરી તપાસ સામે આ કાવતરું ખુલ્લું પડી ગયું હતું. આ કાર્યવાહી દરમિયાન પોલીસે ઘટનાસ્થળેથી રાજસ્થાનના જોધપુરના રહેવાસી એવા બે શખ્સોને ઝડપી પાડી તેમની ધરપકડ કરી છે.
આ સમગ્ર ઓપરેશનમાં પોલીસ ટીમે વિદેશી દારૂનો જથ્થો, માલવાહક ટ્રક અને આરોપીઓના મોબાઈલ ફોન મળીને કુલ રૂ. ૧,૦૧,૭૩,૭૪૦નો તોતિંગ મુદ્દામાલ કબજે કર્યો છે. હાલમાં પોલીસે બંને આરોપીઓ વિરુદ્ધ ગુનો નોંધીને આગળની કાયદેસરની કાર્યવાહી હાથ ધરી છે. આ ઉપરાંત, આટલો મોટો દારૂનો જથ્થો ક્યાંથી ભરાયો હતો, ગુજરાતમાં તેનું અંતિમ સ્થળ કયું હતું અને આ નેટવર્કમાં અન્ય કેટલા લોકો સામેલ છે તે દિશામાં તપાસના ચક્રો ગતિમાન કર્યા છે.
