મહેસાણા જિલ્લામાં ગેરકાયદેસર હથિયારોની હેરાફેરી અને મિલકત વિરુદ્ધના ગુના અટકાવવા માટે પોલીસ દ્વારા ચલાવવામાં આવી રહેલી કુંબિંગ કામગીરી અંતર્ગત લોકલ ક્રાઈમ બ્રાન્ચ (LCB) ને મોટી સફળતા મળી છે. મહેસાણાના નાગલપુર ચોકડી વિસ્તારમાંથી બે દેશી બનાવટની પિસ્તોલ અને એક જીવતા કારતૂસ સાથે પોલીસે એક શખ્સની ધરપકડ કરી છે.
એલસીબી પી.આઈ. એ.એમ. કામળીયાના માર્ગદર્શન હેઠળ પોલીસની ટીમો સતત પેટ્રોલીંગમાં હતી. આ દરમિયાન હેડ કોન્સ્ટેબલ મહેન્દ્રકુમાર અને પોલીસ કોન્સ્ટેબલ મેહુલકુમારને ખાનગી રાહે બાતમી મળી હતી કે નાગલપુર રામજી મંદિર પાસે રહેતો જીગર સોની નામનો શખ્સ હથિયાર સાથે નાગલપુર ચોકડી પાસે ઊભો છે. બાતમીના આધારે એલ.સી.બી.ની ટીમે તુરંત દરોડો પાડી આરોપી જીગર યોગેશકુમાર સોનીને ઝડપી પાડ્યો હતો. તેની તલાશી લેતા પોલીસને તેની પાસેથી દેશી બનાવટની પિસ્તોલ નંગ-2 જેની કિંમત રૂ.50,000, જીવતા કારતૂસ નંગ-01 કે જેની કિંમત રૂ. 100 સહિત મોબાઈલ ફોન નંગ-01 જેની કિંમત રૂ. 10,000 એમ કુલ મળીને રૂ. 60,100/- મુજબનો મુદ્દામાલ મળી આવ્યો હતો.
પોલીસની પ્રાથમિક પૂછપરછમાં ચોંકાવનારો ખુલાસો થયો છે. પકડાયેલા આરોપીએ કબૂલાત કરી હતી કે આ હથિયારો તે અને તેનો મિત્ર વિપુલસિંહ બળવંતસિંહ ઝાલા (રહે. નાગલપુર) બંને જણા રાજસ્થાનના મામેર ખાતેથી રાહુલ પારઘી નામના વ્યક્તિ પાસેથી લાવ્યા હતા. મહેસાણા એલ.સી.બી.એ પકડાયેલા શખ્સ વિરુદ્ધ તેમજ હથિયાર સપ્લાય કરનાર અને સાથ આપનાર અન્ય બે શખ્સો વિરુદ્ધ મહેસાણા શહેર બી-ડિવિઝન પોલીસ સ્ટેશનમાં હથિયાર ધારા (આર્મ્સ એક્ટ) મુજબ ગુનો દાખલ કરાવ્યો છે. હાલમાં પોલીસ ફરાર આરોપીઓને પકડવા અને આ હથિયારોનો ઉપયોગ કોઈ ગુનાહિત પ્રવૃત્તિમાં થવાનો હતો કે કેમ તે અંગે વધુ તપાસ કરી રહી છે.
