મહેસાણાના મોઢેરા ચોકડી વિસ્તારમાં આવેલા નવા બસ સ્ટેન્ડ નજીક એક કાળજું કંપાવનારી ઘટના બની છે. અહીં પૂરપાટ ઝડપે આવી રહેલી એસટી બસની અડફેટે આવતાં એક આધેડનું તેમના જ પુત્રની નજર સમક્ષ કમકમાટીભર્યું મોત નીપજ્યું છે. એક્ટિવા પર જઈ રહેલા પિતા-પુત્રને બસ ચાલકે ગફલતભરી રીતે હંકારીને ટક્કર મારી હતી. અકસ્માત સર્જાયા બાદ આધેડ બસના પાછળના ટાયરના ભાગે ફસાઈને ઢસડાયા હતા. રસ્તા પર લોહીલુહાણ સ્થિતિમાં તરફડતા આ આધેડે તબીબી સારવાર મળે તે પૂર્વે જ પ્રાણ ત્યજી દીધા હતા.
આ હચમચાવી મુકનાર અકસ્માત બાદ ઘટનાસ્થળે લોકોના ટોળેટોળા ઉમટી પડ્યા હતા. ભીડભાડવાળા જાહેર માર્ગ પર બેફામ ગતિએ બસ હંકારતા ડ્રાઈવર સામે લોકોમાં ભારે આક્રોશ જોવા મળ્યો હતો. રોષે ભરાયેલા સ્થાનિકોએ ડ્રાઈવરને સ્થળ પર જ પકડી પાડી પોલીસને હવાલે કર્યો હતો. મૃતકના પુત્ર મહમદ બિલાલ બીડીવાલાએ આપેલી ફરિયાદના આધારે મહેસાણા શહેર બી-ડિવિઝન પોલીસે ગુનો દાખલ કર્યો છે. હાલમાં પોલીસે બસ ચાલકની અટકાયત કરી છે અને અકસ્માતની ઝીણવટભરી તપાસ માટે આસપાસના સીસીટીવી ફૂટેજ પણ કબજે કર્યા છે. મૃતદેહને પોસ્ટમોર્ટમ (પીએમ) અર્થે મોકલી આપવામાં આવ્યો હતો, જેની પ્રક્રિયા પૂર્ણ થયા બાદ દેહ પરિવારજનોને સોંપવામાં આવ્યો છે.
