બનાસકાંઠા એસપીની કડક સૂચના બાદ ટ્રાફિક પોલીસ એક્શન મોડમાં; સામાન્ય જનતા બાદ હવે ખાખી પણ કાયદાના દાયરામાં
બનાસકાંઠા જિલ્લા પોલીસ વડા (SP)ની કડક સૂચના બાદ ડીસામાં Dysp ના માર્ગદર્શન હેઠળ ટ્રાફિક નિયમોના ભંગ બદલ સપાટો બોલાવવામાં આવી રહ્યો છે. જે અંતર્ગત ડીસા ખાતે આજે એક અભૂતપૂર્વ અને સરાહનીય કામગીરી જોવા મળી હતી. ડીસા પોલીસ લાઇનમાંથી બહાર નીકળી રહેલી ખુદ પોલીસ વિભાગની જ કેટલીક ખાનગી અને સરકારી ગાડીઓ, જેમાં પ્રતિબંધિત કાળા કાચ (ડાર્ક ફિલ્મ) લગાવેલા હતા, તેમને ટ્રાફિક પોલીસે અટકાવી હતી. કાયદો બધા માટે સમાન હોવાનો મજબૂત સંદેશ આપતા પોલીસે પોતાની જ ગાડીઓને દંડ ફટકાર્યો હતો અને સ્થળ પર જ કાચ પરથી કાળી ફિલ્મો ઉતરાવી દીધી હતી.
સામાન્ય રીતે કાળા કાચ વાળી ગાડીઓ સામે માત્ર સામાન્ય નાગરિકોને જ દંડવામાં આવતા હોવાની ફરિયાદો ઉઠતી હોય છે, પરંતુ એસપીની સ્પષ્ટ સૂચનાના પગલે ટ્રાફિક પોલીસે કોઈપણ પક્ષપાત વગર ખાખી વર્દીધારીઓ સામે પણ લાલ આંખ કરી છે. ટ્રાફિક પોલીસની આ નિષ્પક્ષ અને કડક કામગીરીને પગલે સ્થાનિક લોકોએ પણ બનાસકાંઠા પોલીસના આ અભિગમને બિરદાવ્યો છે.
