ચોર ખાનામાં છુપાવેલ 1,092 બોટલો મળી કુલ રૂ. 18.49 લાખનો મુદ્દામાલ જપ્ત કર્યો
સાંતલપુર પોલીસે વિદેશી દારૂની હેરાફેરી સામે મોટી કાર્યવાહી કરી છે. પોલીસે બાડમેરથી ભુજ જતી એક લક્ઝરી બસ માંથી લાખો રૂપિયાનો દારૂનો જથ્થો ઝડપી પાડ્યો છે. બુટલેગરોએ દારૂ ગુજરાતમાં ઘુસાડવા માટે બસમાં ખાસ ચોર ખાનું બનાવ્યું હતું.
સાંતલપુર પોલીસને મળેલી ચોક્કસ બાતમીના આધારે પીપરાળા ચેક પોસ્ટ પર વોચ ગોઠવવામાં આવી હતી. શંકાસ્પદ 'ભવાની ટ્રાવેલ્સ'ની લક્ઝરી બસને રોકીને તપાસ કરતા, બસમાં બનાવેલા ગુપ્ત ચોર ખાનામાંથી વિદેશી દારૂનો મોટો જથ્થો મળી આવ્યો હતો.પોલીસે બસમાંથી બિયર અને વિદેશી દારૂની કુલ 1,092 બોટલો કબજે કરી છે, જેની અંદાજિત કિંમત 3.29 લાખ છે. દારૂની હેરાફેરીમાં વપરાયેલી લક્ઝરી બસ અને મોબાઈલ ફોન સહિત કુલ રૂ. 18.49 લાખનો મુદ્દામાલ જપ્ત કરવામાં આવ્યો છે.
સાંતલપુર પોલીસે આ મામલે ગુનો નોંધી વધુ તપાસ હાથ ધરી છે. દારૂનો આ જથ્થો કોના માટે લાવવામાં આવતો હતો, તેમાં અન્ય કોની સંડોવણી છે અને સમગ્ર રેકેટના મૂળ સુધી પહોંચવા માટે પોલીસે તપાસ તેજ કરી હોવાનું જાણવા મળ્યું છે.
