ગ્રામજનો જિલ્લા કક્ષાની તપાસની માંગ પર અડગ
ડીસા તાલુકાના જુનાડીસા ગામમાં ગ્રામ પંચાયતના વિકાસ કામોને લઈને ભારે વિવાદ સર્જાયો છે.એક યુવાન ગ્રામજનોના સમર્થનથી છેલ્લા ત્રણ દિવસથી પંચાયત સામે ભૂખ હડતાલ પર બેઠો છે. તેની તબિયત લથડતા ડીસા સિવિલમાં સારવાર બાદ પણ ત્રીજા દિવસે આંદોલન યથાવત રાખ્યું છે.
ગ્રામજનોનો ગંભીર આક્ષેપ છે કે છેલ્લા ૧૫ વર્ષ દરમિયાન ગામમાં થયેલા વિકાસ કામોમાં સરકારી રેકોર્ડ પર જે કામો પૂર્ણ થયેલા દર્શાવાયા છે, તેમાંથી અનેક કામો વાસ્તવિક રીતે સ્થળ પર અસ્તિત્વમાં જ નથી.તેથી છેલ્લા ૧૫ વર્ષના તમામ વિકાસ કામોનો હિસાબ સાર્વજનિક કરવામાં આવે અને તમામ કામોનું સ્થળ નિરીક્ષણ કરી તટસ્થ તપાસ કરવામાં આવે જેથી દૂધનું દૂધ અને પાણી થઈ શકે. જો કે
મામલો વધુ ગંભીર બનતા ગત મોડી સાંજે ડીસા તાલુકા વિકાસ અધિકારી જે. બી. ચૌધરીએ ધરણા સ્થળની મુલાકાત લીધી હતી. તેમણે ભૂખ હડતાલ પર બેઠેલા યુવક સહિત ગ્રામજનોને ખાતરી આપી હતી કે આ બાબતે તટસ્થ તપાસ કરવામાં આવશે અને જો કોઈ કસૂરવાર સાબિત થશે તો તેની સામે કડક કાર્યવાહી કરાશે.પરંતુ ગ્રામજનો પોતાની માંગ પર અડગ રહ્યા છે. તેમનું કહેવું છે કે આ મામલે જિલ્લા કક્ષાના અધિકારીઓ દ્વારા તપાસ સમિતિ નીમવામાં આવે અને પંચાયતના તમામ સંબંધિત રેકોર્ડ તાત્કાલિક અસરથી કબજે લેવામાં આવે, જેથી પુરાવા સાથે કોઈ છેડછાડ ન થાય. હાલમાં આ મુદ્દે પંથકના રાજકારણમાં ગરમાવો આવી ગયો છે.
