મહેસાણા જિલ્લાના કડી શહેર માટે એક અત્યંત આનંદના સમાચાર આવ્યા છે. લાંબા સમયની પ્રતીક્ષા અને અનેક રજૂઆતો બાદ, આખરે ગુજરાત હાઈકોર્ટે કડીમાં નવી એડિશનલ ડિસ્ટ્રિક્ટ અને સેશન્સ કોર્ટને લીલી ઝંડી આપી દીધી છે. આ સાથે જ કડી ખાતે ૬ઠ્ઠા એડિશનલ ડિસ્ટ્રિક્ટ અને સેશન્સ જજ તરીકે જિતેન્દ્રકુમાર શિવપૂજનરામ પ્રજાપતિની નિમણૂક પણ કરી દેવામાં આવી છે. આ નિર્ણયથી કડી બાર એસોસિએશન અને ન્યાયતંત્ર સાથે જોડાયેલા તમામ લોકોમાં ખુશીનો માહોલ છવાયો છે.
મળતી માહિતી મુજબ, આગામી ૨૨મી જૂનથી કડીમાં આ નવી સેશન્સ કોર્ટનો સત્તાવાર રીતે પ્રારંભ થઈ જશે અને ન્યાયિક કામગીરી શરૂ કરી દેવામાં આવશે. આ કોર્ટની સ્થાપના થવાથી કડી, જોટાણા તેમજ બેચરાજી તાલુકાના હજારો નાગરિકોને સીધો ફાયદો થશે. અગાઉ ગંભીર ફોજદારી અને અન્ય મોટા કેસોની સુનાવણી માટે પક્ષકારોને છેક મહેસાણા સુધી લાંબા થવું પડતું હતું, જે હાલાકીનો હવે અંત આવશે. સ્થાનિક કક્ષાએ જ ન્યાયિક પ્રક્રિયા ઉપલબ્ધ બનતા સામાન્ય અને મધ્યમ વર્ગના લોકોના મુસાફરી પાછળ થતા આર્થિક ખર્ચ અને સમયની મોટી બચત થશે. આ ઉપરાંત, વકીલો માટે પણ કોર્ટની કામગીરી વધુ સરળ અને અનુકૂળ બનશે. કોર્ટ ઘરઆંગણે જ હોવાથી કેસોની સુનાવણીમાં વેગ આવશે અને પડતર કેસોનો ઝડપી નિકાલ થવાથી લોકોને સત્વરે ન્યાય મળવાની વ્યવસ્થા વધુ મજબૂત બનશે.
ઉલ્લેખનીય છે કે, કડી શહેરનો વ્યાપારિક, ઔદ્યોગિક અને વસ્તીની દ્રષ્ટિએ ઝડપી વિકાસ થઈ રહ્યો હોવાથી અહી કેસોનું ભારણ પણ વધી રહ્યું હતું. આ પરિસ્થિતિને પહોંચી વળવા કડી બાર એસોસિએશન દ્વારા સરકાર અને હાઈકોર્ટમાં સેશન્સ કોર્ટ માટે સતત રજૂઆતો કરવામાં આવી રહી હતી. આખરે આ પ્રયત્નો સફળ થયા છે, જેને સ્થાનિક આગેવાનો કડીના ન્યાયિક ઇતિહાસમાં એક મહત્વપૂર્ણ અને સુવર્ણ પગલાં તરીકે જોઈ રહ્યા છે.
