મહેસાણાના કડીમાં 24 કલાકમાં ચાર ઇંચ વરસાદ વાતાવરણમાં ઠંડક પ્રસરી

કડી પંથકમાં મેઘરાજાએ મહેર વરસાવી છે. શનિવારે સવારથી શરૂ થયેલો ધીમી ધારનો વરસાદ રવિવાર બપોર સુધી ચાલુ રહ્યો હતો. છેલ્લા 24 કલાકમાં કડી વિસ્તારમાં 4.5 ઇંચ વરસાદ નોંધાયો છે. શનિવારે રાત્રે 8 વાગ્યા સુધીમાં અઢી ઇંચ વરસાદ સરકારી ચોપડે નોંધાયો હતો. હવામાન વિભાગે આગાહી કરી હતી તે મુજબ સમગ્ર મહેસાણા જિલ્લામાં છેલ્લા બે દિવસથી સતત ધીમી ધારનો વરસાદ પડી રહ્યો છે. હવામાન વિભાગે આગામી 48 કલાક માટે ગુજરાતના વિવિધ જિલ્લાઓમાં ભારેથી અતિભારે વરસાદની આગાહી કરી છે. ચોમાસાની વિદાય વેળાએ સમગ્ર ગુજરાતમાં મેઘરાજા સક્રિય બન્યા છે. કડી પંથકમાં કેટલાક દિવસોના વિરામ બાદ ફરી વરસાદી માહોલ જામ્યો છે. વરસાદને કારણે વાતાવરણમાં ઠંડક પ્રસરી ગઈ છે.