નાકાબંધી દરમિયાન ઈક્કો ચાલક ગાડી મૂકીને ફરાર, 888 બોટલ-બિયરનો જથ્થો મળી આવ્યો
બનાસકાંઠા જિલ્લામાં દારૂની ગેરકાયદેસર હેરાફેરી સામે પોલીસ દ્વારા ચાલી રહેલી કાર્યવાહી દરમિયાન થરા પોલીસ સ્ટેશન વિસ્તારમાંથી ભારતીય બનાવટના વિદેશી દારૂનો મોટો જથ્થો ઝડપી પાડવામાં આવ્યો છે. પોલીસે કુલ રૂ.5,62,344/-નો મુદ્દામાલ કબજે કરી પ્રોહિબિશનનો ગણનાપાત્ર ગુનો નોંધ્યો છે. એલ.સી.બી. ટીમને મળેલી બાતમીના આધારે ખારીયા ગામની સીમમાં ચામુંડા માતાના મંદિર પાસે નાકાબંધી કરવામાં આવી હતી. દરમિયાન મારૂતિ ઈક્કો ગાડી નંબર GJ.08.BN.7393ના ચાલકે પોલીસની નાકાબંધી જોઈ ગાડી રોક્યા વિના હંકારી મૂકી હતી.
પોલીસ ટીમે ગાડીનો પીછો કરતાં ચાલકે ટોટાણા ગામની સીમમાં મેલડી માતાના મંદિર પાસે ગાડી મૂકીને બાવળની ઝાડીમાં ભાગી છૂટ્યો હતો. પોલીસે ગાડીની તપાસ કરતાં તેમાંથી ભારતીય બનાવટના વિદેશી દારૂની બોટલ/બિયર નંગ-888, કિંમત રૂ.2,62,344/- મળી આવ્યા હતા.આ ઉપરાંત પોલીસે રૂ.3,00,000/- કિંમતની મારૂતિ ઈક્કો ગાડી સહિત કુલ રૂ.5,62,344/-નો મુદ્દામાલ કબજે કર્યો છે.
આ મામલે થરા પોલીસ સ્ટેશન ખાતે ગુનો નં.11195051260983/2026 હેઠળ પ્રોહિબિશન એક્ટની કલમ 65(A)(E), 116(2), 98(2) મુજબ કાયદેસરની કાર્યવાહી હાથ ધરવામાં આવી છે. ગાડીનો ચાલક પોલીસ નાકાબંધી દરમિયાન ગાડી મૂકીને ફરાર થઈ ગયો હોવાથી તેની ઓળખ તથા ધરપકડ માટે વધુ તપાસ હાથ ધરવામાં આવી છે.
