સરહદી પંથકના પ્રજાજનોના સહિયારા પુરુષાર્થથી જિલ્લો વિકાસના નવા સીમાચિહ્નો સર કરશે : અધ્યક્ષ
રન ફોર થરાદથી ઢીમા સુધી અધ્યક્ષ શંકરભાઈ ચૌધરીએ પોતે સાયકલ ચલાવીને જિલ્લાના વિકાસ અને સુશાસનનો સંદેશ આપ્યો
પૂજ્ય મહાત્મા ગાંધીજીની જન્મજયંતિ એટલે કે ૨જી ઑક્ટોબર, ૨૦૨૬ ના પાવન અવસરે આજ રોજ નવરચિત વાવ-થરાદ જિલ્લાની સ્થાપનાને સફળતાપૂર્વક એક વર્ષ પૂર્ણ થયું છે. દેશના પ્રધાનમંત્રી નરેન્દ્ર મોદીના 'છેવાડાના વિસ્તારોના સર્વાંગી વિકાસ' અને સરહદી પંથકને વિકાસની મુખ્ય ધારામાં લાવવાના વિઝનને સાકાર કરતાં, ૨ ઑક્ટોબર, ૨૦૨૫ ના રોજ અસ્તિત્વમાં આવેલા આ સરહદી જિલ્લાએ પોતાના પ્રથમ જ વર્ષમાં સુશાસન ક્ષેત્રે નવી ઊંચાઈઓ સર કરી છે.
આ પ્રસંગે આયોજિત કાર્યક્રમમાં અધ્યક્ષએ જિલ્લાવાસીઓને પ્રથમ સ્થાપના દિવસની હાર્દિક શુભેચ્છાઓ પાઠવતા જણાવ્યું હતું કે, "વાવ-થરાદ જિલ્લો બનવાથી આ સરહદી વિસ્તારમાં વહીવટી પ્રક્રિયાઓ ઝડપી બની છે અને છેવાડાના ગામડાઓ સુધી સરકારી યોજનાઓનો લાભ પહોંચ્યો છે. પ્રથમ વર્ષ હંમેશા પાયાની સુવિધાઓ અને સંગઠનનું વર્ષ હોય છે, જેમાં જિલ્લા વહીવટી તંત્ર અને પ્રજાજનોએ અદ્ભુત સહયોગ દર્શાવ્યો છે. એક વર્ષના ટૂંકા ગાળામાં મોટાભાગની સરકારી કચેરીઓ કાર્યરત થતા રાજ્ય સરકાર અને મુખ્યમંત્રીનો વિશેષ આભાર વ્યક્ત કર્યો હતો.
આ સાયક્લોથોન કાર્યક્રમમાં ઇન્ચાર્જ જિલ્લા કલેક્ટર કલ્પેશકુમાર શર્મા, જિલ્લા પોલીસ અધિક્ષક ચિંતન તેરૈયા સહિત વહીવટી તંત્રના ઉચ્ચ અધિકારીઓ, પોલીસ જવાનો, વિવિધ સામાજિક-રાજકીય અગ્રણીઓ, યુવા સાયકલિંગ ક્લબના સભ્યો અને બહોળી સંખ્યામાં નગરજનો ઉપસ્થિત રહ્યા હતા. કાર્યક્રમના અંતે યાત્રાધામ ઢીમા ખાતે શ્રી ધરણીધર ભગવાનના દર્શન કરી જિલ્લાની સુખ, શાંતિ અને સમૃદ્ધિ માટે પ્રાર્થના કરવામાં આવી હતી.
