ઊંઝા બસ સ્ટેન્ડ પાસે ગંદકી અને દબાણનું સામ્રાજ્ય : મુસાફરો મુશ્કેલીમાં

એસ.ટી.ડેપો મેનેજરે મામલતદાર સહિત સબંધિત તંત્રને કરી લેખિત રજૂઆત

ઊંઝા ડેપો બસ સ્ટેન્ડની બાજુમાં આવેલા મ્યુનિસિપલ કોમ્પ્લેક્સના વેપારીઓ દ્વારા ગેરકાયદે દબાણ અને અસ્વચ્છતા ફેલાવવામાં આવતી હોવાનો ડેપો મેનેજરે ગંભીર આરોપ લગાવ્યો છે. આ અંગે યોગ્ય કાર્યવાહી કરવા મામલતદાર કચેરી સહિત વિવિધ સબંધિત વિભાગોમાં રજૂઆત કરવામાં આવી છે.

ઊંઝા એસ.ટી ડેપોની બાજુમાં આવેલા મ્યુનિસિપલ કોમ્પ્લેક્સના દુકાનદારો દ્વારા ડેપોની હદમાં નિયમ કરતાં વધુ જગ્યા રોકીને વપરાશ કરવામાં આવી રહ્યો છે. બસ સ્ટેન્ડ નજીક ખુલ્લામાં નાસ્તાના ટેબલો મૂકીને આરોગ્ય માટે હાનિકારક અને ખુલ્લી વાનગીઓનું વેચાણ કરવામાં આવી રહ્યું છે. મુસાફરોની અવરજવરના રસ્તા પર ચાની લારીઓ, સ્ટેજ અને બેસવાની બેન્ચો મૂકી દેવાતાં મુસાફરોને આવવા-જવામાં ભારે અડચણ પડી રહી છે. ચા અને નાસ્તાના કપ તેમજ પ્લાસ્ટિકના પેકેટો ગટર લાઇન નજીક ફેંકવામાં આવતાં ગટરો જામ થઈ ગઈ છે. ગટરના ગંદા પાણી રસ્તા પર ઊભરાઈને ફેલાઈ રહ્યા છે, જેના કારણે ભારે દુર્ગંધ મારી રહી છે. રોજિંદા ૨૦ હજારથી વધુ મુસાફરોની અવરજવર ધરાવતા અને હાઇવે પર આવેલા આ મહત્વના ડેપો વિસ્તારમાં ગંદકીના કારણે મોટો રોગચાળો ફાટી નીકળે તેવી ભીતિ સેવાઈ રહી છે.

એસ.ટી.ડેપો તંત્ર દ્વારા દુકાનદારોને રુબરૂમાં ગંદકી અને દબાણ ન કરવા વારંવાર સમજાવવામાં આવ્યા હોવા છતાં તેમના વર્તનમાં કોઈ સુધારો આવ્યો નથી. ઉલટાનું વેપારીઓ "અમારી માલિકીની દુકાનમાં વેપાર કરીએ છીએ" તેમ કહીને કર્મચારીઓ સાથે ઝઘડો કરી રહ્યા છે. "શુભ યાત્રા સ્વચ્છ યાત્રા" અભિયાન અંતર્ગત આરોગ્ય વિષયક ગંભીરતા દાખવી તંત્ર દ્વારા ત્વરિત કાયદેસરની કાર્યવાહી કરવામાં આવે તેવી માગણી કરવામાં આવી છે.