ગાંભોઈ-ભિલોડા હાઈવે પર વાવડી નજીક એક ગમખ્વાર અકસ્માત સર્જાયો હતો. પૂરઝડપે આવી રહેલી એક મારુતિ કારે આગળ જતી રિક્ષાને જોરદાર ટક્કર મારી હતી, જેના કારણે રિક્ષા રોડ પર પલટી ખાઈ ગઈ હતી.
આ ભયાનક અકસ્માતમાં રિક્ષામાં મુસાફરી કરી રહેલી એક મહિલાનું ગંભીર ઇજાઓના કારણે કરૂણ મોત નીપજ્યું હતું. જ્યારે રિક્ષા ચાલક સહિત અન્ય પાંચ જેટલા મુસાફરો ગંભીર રીતે ઘાયલ થયા હતા. ઘટનાની જાણ થતા જ આસપાસના લોકો અને 108 એમ્બ્યુલન્સ તાત્કાલિક ઘટનાસ્થળે દોડી આવ્યા હતા. તમામ ઇજાગ્રસ્તોને તરત જ સારવાર અર્થ નજીકની હોસ્પિટલમાં ખસેડવામાં આવ્યા હતા. પોલીસે આ માર્મીક અકસ્માત અંગે ગુનો નોંધી આગળની કાયદેસરની તપાસ હાથ ધરી છે.
