શ્રી સર્વોદય લૉ કોલેજ, કાંટ ખાતે દીપાવલી પર્વ નિમિત્તે રંગોળી સ્પર્ધાનું આયોજન

શ્રી સર્વોદય એજ્યુકેશન ફાઉન્ડેશન ટ્રસ્ટ સંચાલિત શ્રી સર્વોદય લૉ કોલેજ, કાંટ–ડીસા ખાતે તા.04-11-2026 ને મંગળવારના રોજ દીપાવલી પર્વની ઉજવણીના ભાગરૂપે કાયદાના વિદ્યાર્થીઓમાં કલાત્મક અભિગમ, સર્જનાત્મકતા તથા ભારતીય સંસ્કૃતિ પ્રત્યે જાગૃતિ કેળવવાના હેતુથી 'કાયદો અને સંસ્કૃતિ' થીમ આધારિત રંગોળી સ્પર્ધાનું આયોજન કરવામાં આવ્યું હતું.

આ સ્પર્ધામાં વિદ્યાર્થીઓએ ઉત્સાહપૂર્વક ભાગ લઈ વિવિધ કલાત્મક રંગોળીઓ તૈયાર કરી હતી. રંગોળી દ્વારા ભારતીય બંધારણ, ન્યાયનું પ્રતીક, મહિલા સશક્તિકરણ, માનવ અધિકારો તથા સામાજિક જાગૃતિ જેવા વિષયોને સુંદર રીતે રજૂ કરવામાં આવ્યા હતા.વિદ્યાર્થીઓએ પોતાની કલાત્મક પ્રતિભા અને સર્જનાત્મકતાના માધ્યમથી કાયદાકીય જાગૃતિ તથા ભારતીય સંસ્કૃતિનો સુંદર સમન્વય રજૂ કર્યો હતો. સ્પર્ધામાં ઉત્કૃષ્ટ પ્રદર્શન કરનાર વિદ્યાર્થીઓને પ્રથમ, દ્વિતીય અને તૃતીય ક્રમાંક એનાયત કરવામાં આવ્યા હતા.

આ ઉપરાંત સ્પર્ધામાં ભાગ લેનાર તમામ વિદ્યાર્થીઓને પ્રોત્સાહન ઇનામ આપી પ્રોત્સાહિત કરવામાં આવ્યા હતા. આવા શૈક્ષણિક અને સાંસ્કૃતિક કાર્યક્રમો દ્વારા વિદ્યાર્થીઓના સર્વાંગી વિકાસની સાથે તેમની કલાત્મક પ્રતિભાને પ્રોત્સાહન મળે તેવો કોલેજનો ઉમદા અભિગમ રહ્યો છે.

આ પ્રસંગે સર્વોદય ટ્રસ્ટના પ્રમુખ ઈશ્વરભાઈ મિસ્ત્રી, ઉપપ્રમુખ ખેંગારભાઈ ચૌધરી, ટ્રસ્ટી અમૃતભાઈ કંબોયા, ટ્રસ્ટના નિયામક જી.જે. પટેલ, લૉ કોલેજના ઇન્ચાર્જ પ્રિન્સિપાલ યશભાઈ મંડોરા તથા તમામ લો કોલેજનો સ્ટાફગણ ઉપસ્થિત રહ્યા હતા. કાર્યક્રમને અંતે ટ્રસ્ટ દ્વારા દિપાવલી પર્વ નિમિત્તે વિદ્યાર્થીઓને શુભેચ્છા પાઠવી હતી. કાર્યક્રમના અંતે નાસ્તાનું વિતરણ કરી કાર્યક્રમને સફળ બનાવવા માટે કોલેજના સ્ટાફગણ તથા વિદ્યાર્થીઓએ ઉત્સાહપૂર્વક સહયોગ આપી કાર્યક્રમને સફળ બનાવવામાં આવ્યો હતો.