અરવલ્લી જિલ્લામાં સરકારી ગ્રાન્ટના વહીવટ અને વિકાસકીય કાર્યોને લઈને એક મોટો ખુલાસો સામે આવ્યો છે. જિલ્લા આયોજન અધિકારીની કામગીરી અને ગ્રાન્ટના ઉપયોગમાં કથિત અનિયમિતતાઓ તથા પ્રાથમિક ક્ષતિઓ ધ્યાને આવતાં જિલ્લા વહીવટી તંત્ર દ્વારા સખત પગલાં લેવામાં આવ્યા છે. કલેક્ટર મિલિન્દ બાપનાએ આ મામલાને ગંભીરતાથી લઈને આયોજન અધિકારીની કામગીરીની તકેદારી તપાસના આદેશો જારી કર્યા છે.
પ્રાપ્ત પ્રાથમિક વિગતો મુજબ, જિલ્લામાં ફાળવવામાં આવતી ગ્રાન્ટના નાણાંના વપરાશમાં નિયમોનું પાલન થયું છે કે નહીં અને તેમાં ક્યાંક બેદરકારી કે ગેરરીતિ આચરવામાં આવી છે કે કેમ, તે અંગે સઘન તપાસ હાથ ધરવામાં આવશે. કલેક્ટર દ્વારા તપાસ સોંપાતા જિલ્લાના વહીવટી વર્તુળોમાં ભારે ચકચાર મચી ગઈ છે. આ તપાસના અહેવાલ બાદ જવાબદાર અધિકારીઓ સામે કાયદેસરની કડક કાર્યવાહી થવાની પૂરી શક્યતાઓ સેવાઈ રહી છે, જેનાથી ભ્રષ્ટાચાર આચરનારા તત્વોમાં ફફડાટ ફેલાયો છે.
