ગુજરાત શહેરી વિકાસ મિશન દ્વારા ટેકનિકલ મંજૂરી અપાઈ
પાટણ શહેરની પીવાના પાણીની વ્યવસ્થાને વધુ મજબૂત બનાવવા માટે એક મહત્વનો નિર્ણય લેવાયો છે. જેમાં ખોરસમ-સરસ્વતી પાઈપલાઈનથી સિદ્ધિ સરોવર સુધી નવી પાઈપલાઈન નાખવા માટે ગુજરાત શહેરી વિકાસ મિશન (GUDM) દ્વારા ટેકનિકલ મંજૂરી અપાઈ છે. પાટણ નગરપાલિકાએ શહેરની પીવાના પાણીની જરૂરિયાતને ધ્યાનમાં રાખીને ગાંધીનગર ખાતે રજૂઆતો કરી હતી, જે સફળ રહી છે. આ મંજૂરી મુજબ ખોરસમ-સરસ્વતી પાઈપલાઈનમાંથી અલગ કનેક્શન લઈને સીધી સિદ્ધિ સરોવર સુધી આશરે 1260 મીટર લાંબી MS પાઈપલાઈન નાખવામાં આવશે.
આ સમગ્ર કામગીરીનો અંદાજિત ખર્ચ 895.53 લાખ રૂપિયા દર્શાવવામાં આવ્યો છે. આ કામગીરી માટે નગરપાલિકા પ્રમુખ,કારોબારી ચેરમેન, વોટર વર્કસ કમિટી ચેરમેન દ્વારા ગાંધીનગરની સંબંધિત કચેરીઓમાં રજૂઆતો કરાઈ હતી. પાટણ શહેરની વધતી વસતી અને પાણીની જરૂરિયાત પૂરી કરવા માટે સિદ્ધિ સરોવર સુધી પાણી પહોંચાડવાની આ યોજના ભવિષ્યના પાણી પુરવઠા માટે ઘણી મહત્વની સાબિત થશે. નગરપાલિકાએ નાગરિકોને પૂરતું અને સુવ્યવસ્થિત પીવાનું પાણી મળે તે માટે આ આયોજનને પ્રાથમિકતા આપી હોવાનું જાણવા મળ્યું છે.
