રાધનપુર તાલુકાના કમાલપુર ગામમાં ગ્રામ પંચાયતના વી.સી. તથા તલાટીની સતત ગેરહાજરીને કારણે ગ્રામજનો ભારે મુશ્કેલીનો સામનો કરી રહ્યા હોવાનું સામે આવ્યું છે ખાસ કરીને શાળાઓ શરૂ થઈ ગયેલી હોવાથી વિદ્યાર્થીઓને શૈક્ષણિક હેતુઓ માટે આવકના દાખલા, જાતિના દાખલા સહિતના જરૂરી દસ્તાવેજોની તાત્કાલિક જરૂરિયાત છે, પરંતુ જવાબદાર કર્મચારીઓ સમયસર હાજર ન રહેતાં વિદ્યાર્થીઓ અને તેમના વાલીઓને વારંવાર પંચાયત કચેરીના ધક્કા ખાવા પડી રહ્યા છે.
કમાલપુર ગ્રામજનોના જણાવ્યા અનુસાર અનેક વખત કચેરીએ પહોંચ્યા બાદ પણ સંબંધિત અધિકારીઓ હાજર મળતા નથી, જેના કારણે જરૂરી કામગીરી અટવાઈ રહી છે. આવકના દાખલાઓ વિના વિદ્યાર્થીઓને શિષ્યવૃત્તિ, પ્રવેશ પ્રક્રિયા અને અન્ય સરકારી યોજનાઓનો લાભ મેળવવામાં મુશ્કેલી પડી રહી છે. ગામલોકોમાં વહીવટી તંત્ર સામે રોષની લાગણી જોવા મળી રહી છે કમાલપુર ગ્રામજનોએ માંગ કરી છે કે કમાલપુર ગ્રામ પંચાયત ખાતે વી.સી. અને તલાટીની નિયમિત હાજરી સુનિશ્ચિત કરવામાં આવે તેમજ વિદ્યાર્થીઓ અને સામાન્ય નાગરિકોની કામગીરી તાત્કાલિક ધોરણે પૂર્ણ કરવામાં આવે.
