મહેસાણા શહેરના વી. કે. વાડી વિસ્તાર પાસે આવેલી શક્તિનગર સોસાયટીમાં મંગળવારે સાંજના સમયે એક ચોંકાવનારી ઘટના બની હતી. સોસાયટીના મકાન નંબર ૩૪માં રહેતા ગીતાબેન રાજેશભાઈ ગુપ્તાના ઘરમાં અચાનક એર કન્ડિશનર (AC) બ્લાસ્ટ થતાં વિકરાળ આગ ભભૂકી ઉઠી હતી. ધડાકાભેર લાગેલી આ આગને પગલે આસપાસના રહીશોમાં ભારે અફરાતફરી અને ભયનો માહોલ સર્જાયો હતો.
પ્રાપ્ત માહિતી અનુસાર, મંગળવારે સાંજે પાંચ વાગ્યાની આસપાસ ગીતાબેન તેમના બેડરૂમમાંથી બહાર નીકળ્યા હતા. તેઓ બહાર આવ્યાની ગણતરીની મિનિટોમાં જ બેડરૂમમાં લગાવેલા એસીમાં જોરદાર ધડાકો થયો અને જોતજોતામાં આગે આખા રૂમને પોતાની ચપેટમાં લઈ લીધો હતો. ગભરાયેલાં ગીતાબેન પોતાનો જીવ બચાવવા તાત્કાલિક ઘરની બહાર દોડી ગયા હતા. તેમણે પડોશમાં જ રહેતા તેમના ભાઈ અશોકભાઈ ગુપ્તાને જાણ કરતાં આસપાસના લોકો મદદ માટે દોડી આવ્યા હતા, પરંતુ ત્યાં સુધીમાં આગ સમગ્ર બેડરૂમમાં ફેલાઈ ચૂકી હતી.
આ ઘટનાની જાણ મહેસાણા મહાનગરપાલિકાના ફાયર વિભાગને કરવામાં આવતા, ફાયર ફાઇટરોની ટીમ તાબડતોબ ઘટનાસ્થળે પહોંચી ગઈ હતી. ફાયર બ્રિગેડના જવાનોએ પાણીનો મારો ચલાવીને આશરે એક કલાકની ભારે જહેમત બાદ આગ પર સંપૂર્ણ કાબૂ મેળવ્યો હતો. જોકે, આગ બુઝાય ત્યાં સુધીમાં બેડરૂમમાં રહેલો પલંગ, ખુરશીઓ, કપડાં અને કીમતી ફર્નિચર બળીને સંપૂર્ણ રાખ થઈ ગયું હતું. આ ઉપરાંત, આગની ભયંકર ગરમી અને ધુમાડાને કારણે ઘરના અન્ય રૂમોમાં પણ ભારે નુકસાન પહોંચ્યું હતું. આ ગોઝારી દુર્ઘટનામાં મોટું આર્થિક નુકસાન થયું હતું, પરંતુ સદભાગ્યે કોઈ પણ પ્રકારની જાનહાનિ ન થતાં પરિવારે અને સ્થાનિકોએ રાહતનો શ્વાસ લીધો હતો.
