પોલીસે ગણતરીના દિવસોમાં ચોરીનો ભેદ ઉકેલ્યો
વાવ તાલુકાના ચાંદરવા ગામે તાજેતરમાં થયેલ ઘરફોડ ચોરીનો વાવ પોલીસ અને -પેરોલ ફર્લો સ્ક્વોડની ટીમે ગણતરીના દિવસોમાં ભેદ ઉકેલી રોકડ રકમ સાથે ત્રણ શખ્સોને રાજસ્થાનથી પકડી પાડી ચોરીનો ભેદ ઉકેલ્યો છે.
મળતી વિગતો અનુસાર એક સપ્તાહ પહેલા ચાંદરવા ગામે રહેતા વાઘજીભાઈ વિહાજી રાજપુતના ખેતરમાં આવેલ રહેણાંક મકાનના રૂમમાં વાઘજીભાઈએ તિજોરીમાં મુકેલા રૂ. 3.00,000 (ત્રણ લાખ) ની રોકડની ચોરી થયાની વાવ પોલીસ સ્ટેશન ખાતે ફરિયાદ નોંધાઈ હતી. વાવ પોલીસ અને પેરોલ ફર્લો વાવ-થરાદની પોલીસે અલગ-અલગ ટીમો બનાવી ટેકનિકલ સર્વેલન્સ, હ્યુમન સોર્સ તથા બાતમીદારોની મદદથી ચોરી કરનાર જેઠાભાઈ ચતરાભાઈ ઠાકોર, ગણપતભાઈ ચતરાભાઈ ઠાકોર અને અમરતભાઈ ચતરાભાઈ ઠાકોર (ત્રણેય રહે. બાવરવાળા, તા. સેડવા, જી. બાડમેર - રાજસ્થાન) ને ઝડપી લીધા હતા. પોલીસે આરોપીઓ પાસેથી ચોરીમાં ગયેલ રકમમાંથી રૂ.1.80,000 રોકડા કબ્જે કર્યા છે અને ત્રણેય વિરુદ્ધ કાર્યવાહી કરી વધુ તપાસ અર્થે રિમાન્ડ મેળવવા તજવીજ હાથ ધરી છે. આમ ગણતરીના દિવસોમાં ચોરીનો ભેદ ઉકેલી મુદામાલ રિકવર કરતા ફરિયાદીએ વાવ પોલીસની કામગીરીને બિરદાવી આભાર વ્યક્ત કર્યો હતો.
