પાટણ સિવિલ હોસ્પિટલમાં રોજની 600 થી વધુ ઓપીડી નોંધાઈ
પાટણ શહેર અને સમગ્ર જિલ્લામાં છેલ્લા કેટલાક સમયથી વાતાવરણમાં સતત પલટો જોવા મળી રહ્યો છે.ચોમાસાની મોસમ વચ્ચે છેલ્લા ૨૦ દિવસથી વરસાદે વિરામ લેતાં દિવસે અસહ્ય ગરમી-બફારો અને રાત્રે ભેજયુક્ત ઠંડક એમ બેવડી ઋતુનો અનુભવ થઈ રહ્યો છે. આ વિષમ હવામાનના કારણે લોકોની રોગપ્રતિકારક શક્તિ પર વિપરીત અસર પડી છે. પરિણામે શહેર અને જિલ્લામાં વાયરલ ફીવર, તાવ, શરદી અને ઉધરસ જેવા રોગોનું પ્રમાણ વિસ્ફોટક રીતે વધી રહ્યું છે.
હવામાનના આ ફેરફાર વચ્ચે પાટણની સિવિલ હોસ્પિટલમાં દિવસ દરમ્યાન દર્દીઓની ભારે ભીડ જોવા મળી રહી છે. જૂન અને જુલાઈ મહિનામાં માત્ર બે મહિનાનાગાળામાં હોસ્પિટલમાં 20,476 નવા દર્દીઓ સહિત કુલ 29,519 આઉટડોર (OPD) દર્દીઓ નોંધાયા છે.જ્યારે કુલ 3,516 દર્દીઓએ ઇન્ડોર (IPD) દર્દી તરીકે ગંભીર સારવારલીધી છે.દરરોજ સરેરાશ 600 થી વધુ દર્દીઓ સારવાર અર્થે સિવિલ હોસ્પિટલમાં આવી રહ્યા છે.તબીબી વિશ્લેષણ મુજબ, બે મહિનામાં 15,840 મહિલાઓએ OPD સારવાર લીધી છે,જ્યારે 7,012 બાળકો તાવ અને વાયરલ ઇન્ફેક્શનથી પીડાતા હોસ્પિટલ પહોંચ્યા હતા. ડોક્ટરોના જણાવ્યા મુજબ મહિલાઓ અને નાના બાળકોમાં રોગપ્રતિકારક શક્તિ ઓછી હોવાથી વાતાવરણના બદલાવની અસર તેમના પર ઝડપથી થાય છે.
