વિજાપુર તાલુકાના વસાઈ ગામના બે યુવાનોને વિદેશ મોકલવાની લાલચ આપીને તેમની સાથે છેતરપિંડી અને લૂંટ આચરવામાં આવી હતી. આ ચકચારી કેસમાં યુવાનોને વિદેશ મોકલવાના બહાને પૈસા લેવા આવેલા શખ્સોએ કુલ ₹64 લાખની માતબર રકમની લૂંટ ચલાવી હતી અને ત્યાંથી ફરાર થઈ ગયા હતા. આ ગંભીર ગુનામાં પકડાયેલા અને હાલમાં જેલમાં બંધ આરોપી ભાવેશ વાળંદ દ્વારા તપાસ પૂર્ણ થયા બાદ કોર્ટમાં આફ્ટર ચાર્જશીટ રેગ્યુલર જામીન અરજી દાખલ કરવામાં આવી હતી.
મહેસાણાની સેશન્સ કોર્ટમાં ન્યાયાધીશ એમ.એફ. ખત્રી સમક્ષ આ જામીન અરજી પર સુનાવણી હાથ ધરવામાં આવી હતી. સુનાવણી દરમિયાન સરકારી વકીલ પરેશકુમાર કે. દવે દ્વારા આરોપી વિરુદ્ધ સચોટ અને ધારદાર દલીલો કરવામાં આવી હતી. કોર્ટમાં વિશેષ રૂપે એ બાબતની દલીલ કરાઈ હતી કે આ કેસની તપાસ દરમિયાન આરોપી પાસેથી ₹10 લાખની રકમ રિકવર પણ કરવામાં આવી છે, જે તેની ગુનામાં સંડોવણી સ્પષ્ટ કરે છે. ગુનાની ગંભીરતા અને સરકારી વકીલની દલીલોને ગ્રાહ્ય રાખીને મહેસાણા સેશન્સ કોર્ટે આરોપી ભાવેશ વાળંદની જામીન અરજી ફગાવી દીધી છે.
