આતંકવાદી હુમલામાં માર્યા ગયેલા લોકોને શ્રદ્ધાંજલિ; આજે મુંબઈ અને હૈદરાબાદ મેચમાં બંને ટીમો કાળી પટ્ટી પહેરીને રમશે

જમ્મુ અને કાશ્મીરના પહેલગામમાં થયેલા આતંકવાદી હુમલાએ સમગ્ર દેશને હચમચાવી નાખ્યો છે. 22 એપ્રિલના રોજ, આતંકવાદીઓએ બૈસરન વિસ્તારમાં પ્રવાસીઓ પર અંધાધૂંધ ગોળીબાર કર્યો, જેમાં 26 લોકો માર્યા ગયા અને ઘણા લોકો ઘાયલ થયા. આ પીડાદાયક આતંકવાદી હુમલા બાદ દેશભરમાં શોકનું મોજુ ફરી વળ્યું છે. કેન્દ્રીય ગૃહમંત્રી અમિત શાહ તાત્કાલિક કાશ્મીર પહોંચ્યા અને પરિસ્થિતિનો તાગ મેળવ્યો. આ દરમિયાન, વડા પ્રધાન નરેન્દ્ર મોદીએ સાઉદી અરેબિયાનો પ્રવાસ અધવચ્ચે જ છોડીને સ્વદેશ પાછા ફરવાનો નિર્ણય કર્યો. આ હુમલાની અસર રમતગમતની દુનિયા પર પણ પડી છે. BCCI એ આઈપીએલ 2025 ને લઈને એક મહત્વપૂર્ણ નિર્ણય લીધો છે. આઈપીએલની મેચમાં જ્યારે સનરાઇઝર્સ હૈદરાબાદ અને મુંબઈ ઇન્ડિયન્સ એકબીજા સામે ટકરાશે, ત્યારે બંને ટીમોના ખેલાડીઓ કાળી પટ્ટી પહેરીને મેદાનમાં ઉતરશે. આ મેચમાં ન તો ચીયરલીડર્સ પરફોર્મ કરશે અને ન તો કોઈ ફટાકડા ફોડશે. આ ઉપરાંત, આતંકવાદી હુમલામાં માર્યા ગયેલા લોકોને શ્રદ્ધાંજલિ આપવા માટે મેચ શરૂ થાય તે પહેલાં એક મિનિટનું મૌન પાળવામાં આવશે.