રાધનપુર-મહેસાણા હાઇવે પર નર્મદા કેનાલ અને IOCL કંપની પાસે એક અકસ્માત થયો હતો. અહીં પગપાળા જઈ રહેલા હારીજ તાલુકાના સોઢવ ગામના ભરતભાઈ પરમારને એક અજાણ્યા વાહને ટક્કર મારી હતી. ટક્કર વાગતા ભરતભાઈના માથાના ભાગે ગંભીર ઈજાઓ થઈ હતી. અકસ્માત કર્યા પછી વાહન ચાલક ત્યાંથી ભાગી ગયો હતો.
મળતી માહિતી મુજબ, ગઈકાલે રાત્રે લગભગ પોણા બાર વાગ્યે IOCL કંપનીનો સ્ટાફ રાધનપુર ચા-નાસ્તો કરવા નીકળ્યો હતો. નર્મદા કેનાલ પાસે તેમણે ભરતભાઈને ઈજાગ્રસ્ત હાલતમાં જોતાં તેઓ તરત જ ભરતભાઈને રાધનપુરની ખાનગી હોસ્પિટલ અને પછી સરકારી રેફરલ હોસ્પિટલ લઈ ગયા હતા.જોકે, સારવાર દરમિયાન ભરતભાઈનું મોત થયું હતું. આ ઘટનાની જાણ થતાં જ મૃતકના મોટા ભાઈ પ્રવિણભાઈ રાધનપુર સરકારી હોસ્પિટલ પહોંચ્યા હતા. પ્રવિણભાઈની ફરિયાદના આધારે રાધનપુર પોલીસે અજાણ્યા વાહનચાલક સામે ગુનો નોંધી આગળની તપાસ શરૂ કરી હોવાનું જાણવા મળ્યું છે.
