ડીસા શહેરમાં ટ્રાફિક વ્યવસ્થાને સુદ્રઢ બનાવવા માટે ટ્રાફિક પીએસઆઈ ડી.બી. ચૌધરીના માર્ગદર્શન હેઠળ વિશેષ ચેકિંગ ડ્રાઇવ હાથ ધરવામાં આવી હતી. આ કામગીરી દરમિયાન પોલીસ સ્ટાફના કાનજીભાઈ સહિતની ટીમે શહેરના મુખ્ય માર્ગો પર વાહનોની સઘન તપાસ કરી હતી. ચેકિંગ દરમિયાન હેલ્મેટ, ડ્રાઇવિંગ લાયસન્સ અને આર.સી. બુક જેવા જરૂરી દસ્તાવેજોની તપાસ કરવામાં આવી હતી. જરૂરી દસ્તાવેજો વગર વાહન ચલાવતા ચાલકો સામે કડક પગલાં લઈ રૂ. 500 નો દંડ વસૂલવામાં આવ્યો હતો.
પોલીસની આ કડક કામગીરીને કારણે નિયમભંગ કરનાર વાહન ચાલકોમાં ફફડાટ ફેલાયો હતો. ટ્રાફિક પોલીસ દ્વારા આપવામાં આવેલા સંદેશ મુજબ, શહેરમાં અકસ્માતોને રોકવા અને લોકોની સલામતી માટે આવી કામગીરી આગામી દિવસોમાં પણ ચાલુ રાખવામાં આવશે.ત્યારે વાહન ચાલકોને નિયમોનું પાલન કરવા, હેલ્મેટ ફરજિયાત પહેરવા અને જરૂરી દસ્તાવેજો સાથે રાખવા અપીલ કરવામાં આવી છે, જેથી દંડ તથા અકસ્માતોથી બચી શકાય.
