ઘેટાં - બકરાની જેમ બાળકો ભરી વાનના આડેધડ પાર્કિંગથી ટ્રાફીકજામ સાથે ગમખ્વાર અકસ્માતની પણ દહેશત
બનાસકાંઠા જિલ્લાના તાલુકા મથક ડીસા શહેરમાં છેલ્લા કેટલાક સમયથી શાળાઓમાં અભ્યાસ કરતા વિદ્યાર્થીઓના જીવ જોખમમાં મૂકીને ઘેટાં-બકરાંની જેમ ભૂલકાંઓને ભરીને દોડતી સ્કૂલ વાનો સામે ઉચ્ચ કક્ષાએ રજૂઆત બાદ શહેર ટ્રાફિક પોલીસ હરકતમાં આવી છે પરંતુ નામ પૂરતી કાર્યવાહી હાથ ધરતા જાગૃત નાગરિકો અને સ્થાનીક વાલીઓમાં ભારે અસંતોષ જોવા મળી રહ્યો છે. તેથી શહેર ટ્રાફિક પોલીસ માત્ર દંડાત્મક કાર્યવાહી કરીને સંતોષ માની રહી હોવાના આક્ષેપ ઉઠ્યા છે.
મળતી માહિતી મુજબ, ડીસા શહેરની વિવિધ શાળાઓ નજીક અને મુખ્ય બજાર રોડ પર સ્કૂલ વાનો આડેધડ પાર્ક કરી બાળકોને બેસાડવા-ઉતારવામાં આવે છે.જેના કારણે ટ્રાફિકની ગંભીર સમસ્યાઓ સર્જાય છે અને અકસ્માતનો ભય પણ સતત તોળાતો રહે છે. આ બાબતે જાગૃત નાગરિક દ્વારા બનાસકાંઠા જિલ્લા પોલીસ વડાને લેખિતમાં રજૂઆત કરવામાં આવી હતી.જે રજૂઆત બાદ ડીસા શહેર ટ્રાફિક પોલીસ શાખા દ્વારા સેન્ટ ઝેવિયર્સ, હરિઓમ હાઈસ્કૂલ, સરદાર પટેલ, આદર્શ સ્કૂલ, સંત અન્ના, સ્કાય ઇન્ટરનેશનલ અને એન્જલ સ્કૂલ સહિતની તમામ શાળાઓના આચાર્યને નોટિસ પાઠવવામાં આવી છે.
જેમાં શાળાના સ્ટાફના વાહનો, વિદ્યાર્થીઓના વાહનો તેમજ બાળકોને મૂકવા-લેવા આવતી સ્કૂલ વાનો અને વાલીઓના વાહનો માટે શાળાના કમ્પાઉન્ડની અંદર જ પાર્કિંગની વ્યવસ્થા કરવાની તાકીદ કરવામાં આવી છે. તેમજ મુખ્ય રસ્તાઓ કે રોડ પર વાહનો પાર્ક ન થાય તે સુનિશ્ચિત કરવાની સૂચના આપવામાં આવી છે. જેથી ટ્રાફિક સમસ્યા કે અકસ્માત નિવારી શકાય. ટ્રાફિક પોલીસે સ્પષ્ટ ચેતવણી આપી છે કે જો નોટિસ બાદ પણ યોગ્ય પાર્કિંગ વ્યવસ્થા ઉભી કરવામાં નહીં આવે અને ટ્રાફિક અડચણરૂપ જણાશે, તો શાળા સંચાલકો તથા સ્કૂલ વાન ચાલકો સામે કાયદેસરની કડક કાર્યવાહી હાથ ધરવામાં આવશે.
જોકે, સ્થાનિક લોકોનું માનવું છે કે માત્ર મેમો આપીને કે નોટિસ ફટકારીને સંતોષ માનવાને બદલે ઘેટાં-બકરાંની જેમ ઓવરલોડ બાળકો ભરતાં વાહન ચાલકો સામે પોલીસ દ્વારા નક્કર અને કડક કાર્યવાહી કરવામાં આવે તે અત્યંત જરૂરી છે. કારણ તેનાથી હોનારત સર્જાઈ શકે છે.
