ઊડતી ધૂળ અને ચોમેર ખાડા રાજથી હાલાકી,માર્ગ અકસ્માતની સતત દહેશત
બનાસકાંઠા જિલ્લાને પાટણ અને સૌરાષ્ટ્ર સાથે જોડતા મહત્વના હાઇવે પર ડીસાના ભોપાનગર ફાટક નજીક નિર્માણાધીન ઓવરબ્રિજ તથા ડીસાથી જુનાડીસા સુધીના 8 માર્ગીય રોડની કામગીરી ધીમી ગતિએ ચાલી રહી છે.જેમાં યોગ્ય આયોજનના અભાવે રોજિંદા ટ્રાફિકની સમસ્યા ગંભીર બની રહી છે. દિવસ દરમિયાન અવારનવાર કલાકો સુધી વાહનોની લાંબી કતારો લાગતાં વાહન ચાલકો, સ્થાનિક મુસાફરો અને રહીશો ભારે હાડમારી ભોગવી રહ્યા છે.
સ્થાનિકોના જણાવ્યા મુજબ, ઓવરબ્રિજની સાથે રોડનું કામ પણ ધીમી ગતિએ ચાલી રહ્યું છે. ડાયવર્ઝન માર્ગ પર યોગ્ય વ્યવસ્થા કરવામાં આવી નથી તેમજ ખાડાઓ પૂરવામાં ન આવતા ઉબડખાબડ રસ્તા અને ધૂળની ડમરીઓથી લોકો ત્રસ્ત છે. એક તરફ બ્રિજનું કામ અને બીજી તરફ રોડનું કામ ઝડપથી પૂર્ણ ન થતાં માર્ગ પર અકસ્માતનો ભય પણ સતત રહે છે. સ્થાનિક વેપારીઓ અને વાહન ચાલકોએ તંત્ર દ્વારા તાત્કાલિક ગંભીરતા દાખવી કામગીરીમાં ઝડપ લાવી ટ્રાફિકની સમસ્યામાંથી લોકોને રાહત આપવાની માંગ કરી છે.
