રૂ. ૫.૩૦ લાખથી વધુની કિંમતના ૩૩ મોબાઈલ અને ૧ બાઈક મૂળ માલિકોને પરત સોંપાયા
બનાસકાંઠા રેન્જ પોલીસ મહાનિરીક્ષક પરિક્ષિતા રાઠોડના ડીસા વિભાગના દ્વિ-વાર્ષિક ઇન્સ્પેક્શન અંતર્ગત ડીસા ખાતે એક વિશેષ “તેરા તુજકો અર્પણ” કાર્યક્રમનું આયોજન કરવામાં આવ્યું હતું. નાગરિકોની ગુમાવેલી કે ચોરાયેલી મિલકતો શોધીને મૂળ માલિકોને પરત સોંપવાના આ કાર્યક્રમમાં પોલીસે સફળતાપૂર્વક મેળવેલો મુદ્દામાલ પ્રજાજનોને અર્પણ કર્યો હતો.પોલીસ દ્વારા ટેકનિકલ સર્વેલન્સ અને સી-ટ્રેસ પોર્ટલ તેમજ સઘન તપાસના આધારે શોધવામાં આવેલા કુલ ૩૩ મોબાઈલ ફોન અને ૧ મોટરસાઈકલ મળીને રૂ. ૫,૩૦,૪૯૫/- ની મત્તાનો મુદ્દામાલ તેના સાચા માલિકોને પરત સોંપવામાં આવ્યો હતો. પોતાની ગુમાવેલી કિંમતી વસ્તુઓ અને વાહન પરત મળતાં નાગરિકોના ચહેરા પર ખુશી જોવા મળી હતી અને તેમણે પોલીસ વિભાગનો આભાર વ્યક્ત કર્યો હતો.
કાર્યક્રમ દરમિયાન આઈ.જી.પી. પરિક્ષિતા રાઠોડે જણાવ્યું હતું કે, આ કાર્યક્રમનો મુખ્ય હેતુ પ્રજાજનોનો પોલીસ પ્રત્યેનો વિશ્વાસ વધુ દ્રઢ બને અને કાયદો- વ્યવસ્થા જાળવવામાં પોલીસને સક્રિય લોકસહયોગ મળતો રહે તે છે આ કાર્યક્રમમાં બનાસકાંઠા રેન્જ આઈ.જી. પરિક્ષિતા રાઠોડ, જિલ્લા પોલીસ વડા પ્રશાંત સુંબે, ડીસા ડી.વાય.એસ.પી. સી. એલ. સોલંકી, ડીસાના ત્રણેય પોલીસ મથકના પી.આઈ. તથા પોલીસ સ્ટાફ અને મોટી સંખ્યામાં સ્થાનિક નાગરિકો ઉપસ્થિત રહ્યા હતા.
