તાલુકાના ખોડા ગામે આવેલ વિનય વિદ્યામંદિર ખાતે તાલુકા કક્ષાના ખેલમહાકુંભનું આયોજન કરવામાં આવ્યું હતું. રમતગમત ક્ષેત્રે વિદ્યાર્થીઓમાં રહેલી પ્રતિભાને પ્રોત્સાહન મળે તેમજ યુવાનોમાં રમતગમત પ્રત્યેનો ઉત્સાહ વધે તે હેતુથી યોજાયેલા આ કાર્યક્રમમાં વિવિધ રમતગમત પ્રવૃત્તિઓમાં વિદ્યાર્થીઓએ ઉત્સાહભેર ભાગ લીધો હતો.
આ પ્રસંગે જિલ્લા પંચાયતના અધ્યક્ષ પ્રધાનજી રાઠોડ, જિલ્લા શિક્ષણાધિકારી કચેરીના એઆઈ શ્રીમતી અનીશાબેન પ્રજાપતિ, એપીએમસી થરા ચેરમેન ઇશ્વરભાઈ પટેલ, બનાસ ડેરીના ડિરેક્ટર તથા દાતા બાબુભાઈ પટેલ, જિલ્લા પંચાયત સદસ્ય રમેશભાઈ પટેલ, તાલુકા ભાજપ પ્રમુખ નટુભાઈ પટેલ, સર્વોદય ટ્રસ્ટના મંત્રી સુનિલભાઈ તરક, બનાસકાંઠા જિલ્લા આચાર્ય સંઘના મહામંત્રી તથા શાળાના આચાર્ય જે.વી. પટેલ, સરપંચ વાઘાભાઈ સહિત આમંત્રિત મહેમાનો ઉપસ્થિત રહ્યા હતા.
કાર્યક્રમમાં ગામજનો, શિક્ષકો અને મોટી સંખ્યામાં વિદ્યાર્થીઓ ઉપસ્થિત રહ્યા હતા. ઉપસ્થિત મહેમાનોએ વિદ્યાર્થીઓને રમતગમત ક્ષેત્રે આગળ વધવા પ્રોત્સાહિત કર્યા હતા. ઉત્સાહપૂર્ણ વાતાવરણ વચ્ચે તાલુકા કક્ષાનો ખેલમહાકુંભ કાર્યક્રમ સંપન્ન થયો હતો.
