અજાણ્યો તસ્કર CCTV કેમેરામાં કેદ; મેડિકલ સ્ટોરમાં નોકરી દરમિયાન પાર્ક કરેલી નવી સ્પ્લેન્ડર પ્લસની ચોરી, પોલીસે તપાસ હાથ ધરી
ડીસા શહેરમાં વાહન ચોરીની વધતી ઘટનાઓ વચ્ચે વધુ એક બાઇક ચોરીનો બનાવ સામે આવ્યો છે. HDFC બેંકની બાજુની ગલીમાં પાર્ક કરાયેલી નવી બાઇક અજાણ્યો તસ્કર ચોરી કરી ફરાર થયો હતો.ચોરીની સમગ્ર ઘટના નજીકના CCTV કેમેરામાં કેદ થઈ છે. જેથી પોલીસે તેના આધારે તપાસ શરૂ કરી છે.
ફરિયાદ મુજબ, ડીસા મુકામે રહેતા અને ખાનગી મેડિકલ એજન્સીમાં નોકરી કરતા રાહુલભાઈ ઈશ્વરભાઈ ચૌધરીએ 7 જુલાઈ, 2026 ના રોજ સવારે પોતાની હીરો સ્પ્લેન્ડર પ્લસ-2024 બાઇક (નં. GJ-08-DK-6125) HDFC બેંકની બાજુની ગલીમાં પાર્ક કરી હતી.પણ સાંજે નોકરી પૂર્ણ કરીને બહાર આવતા બાઈક સ્થળ પરથી ગાયબ હોવાનું જાણવા મળ્યું હતું.જેથી આસપાસ તેમજ પોતાના સ્તરે ઘણી શોધખોળ કરી હતી, પરંતુ કોઈ ભાળ ન મળતાં ડીસા શહેર પોલીસ મથકે ફરિયાદ નોંધાવી હતી. ચોરી થયેલી બાઇકની અંદાજિત કિંમત રૂ. 60 હજાર હોવાનું ફરિયાદમાં જણાવાયું છે.
બનાવમાં અજાણ્યો તસ્કર CCTV કેમેરામાં કેદ થયો છે. પોલીસે અજાણ્યા તસ્કર સામે ગુનો નોંધી CCTV ફૂટેજના આધારે તેની ઓળખ મેળવવા અને ચોરી થયેલ બાઇક શોધવા તપાસ તેજ કરી છે.
