સમી તાલુકાના ચડીયાણા ગામે આવેલા લેન્કો સોલાર પ્લાન્ટમાંથી કેબલ વાયરની ચોરી થઈ હતી. આ મામલે પાટણ લોકલ ક્રાઈમ બ્રાન્ચે તપાસ કરીને બે આરોપીઓને ઝડપી પાડ્યા છે. પોલીસે ચોરીનો મુદ્દામાલ અને ગુનામાં વપરાયેલી રિક્ષા સહિત કુલ 3.80 લાખ રૂપિયાનો મુદ્દામાલ જપ્ત કર્યો છે.
સિક્યુરિટી ગાર્ડે સમી પોલીસ સ્ટેશનમાં ફરિયાદ નોંધાવી હતી કે વહેલી સવારે તપાસ દરમિયાન પ્લાન્ટના પોઈન્ટ નંબર 3 પરથી 95 સ્ક્વેર એમ.એમ.નો 120 ફૂટ લાંબો કોપર વાયર ગુમ હતો.આ વાયરની કિંમત આશરે 80 હજાર રૂપિયા હતી.પાટણ LCBના પીઆઈ રાકેશ ઉનાગરની ટીમને બાતમી મળી હતી કે ચોરીના કેબલ સાથે બે શખ્સો રિક્ષામાં રાધનપુર વિસ્તારમાં ફરી રહ્યા છે. આ બાતમીના આધારે પોલીસે નાકાબંધી કરીને સિનાડ ગામના નરેશભાઈ રામાભાઈ ઠાકોર અને તાંતિયાણા ગામના ભરતજી ધારશીજી ઠાકોરને ઝડપી પાડ્યા હતા.પોલીસે આરોપીઓ પાસેથી ચોરીનો કેબલ વાયર અને ગુનામાં વપરાયેલી રિક્ષા સહિત કુલ 3.80 લાખ રૂપિયાનો મુદ્દામાલ કબજે કર્યો છે. વધુ તપાસ માટે આરોપીઓને સમી પોલીસને સોંપવામાં આવ્યા હોવાનું જાણવા મળ્યું છે.
