પાટણ આરટીઓ કચેરીમાં મંગળવારે એક મોટી માનવીય ભૂલના કારણે ઇન્ટરનેટ કનેક્ટિવિટી આખો દિવસ માટે ખોરવાઈ ગઈ હતી. જેના પરિણામે કચેરીની તમામ ઓનલાઈન કામગીરી સંપૂર્ણપણે બંધ રહી હતી. 100 લાયસન્સ ટેસ્ટ ડ્રાઇવિંગ એપોઇન્ટમેન્ટ હતી. 30થી વધુ લોકો કંડકટર લાયસન્સ માટે આવ્યા હતા. રિ-પાર્સિંગ જેવી કામગીરી માટે દૂર-દૂરના ગામડાઓ અને અંતરિયાળ વિસ્તારોમાંથી આવેલા 200 થી વધુ અરજદારોને ભારે હાલાકીનો સામનો કરવો પડ્યો હતો.લાયસન્સની ટેસ્ટ આપવા માટે છેક દૂરના સાતલપુરથી ભાડું ખર્ચીને આવેલ અરજદારે આક્રોશ વ્યકત કરતાં જણાવ્યું હતું કે અહીં આવ્યા પછી ખબર પડી કે સિસ્ટમ બંધ છે. અમારો આખો દિવસ બગડ્યો અને આર્થિક ભાડું,ખાવા પીવાના થઈ રૂ.500 નુકસાન વેઠવું પડ્યું હોવાનું જણાવ્યું હતું.
આ બાબતે એઆરટીઓ જે.કે.મોઢે જણાવ્યું હતું કે સવારે 10:00 વાગ્યે નેટ ચાલુ હતું અને અચાનક નેટ બંધ થઈ ગયું એટલે અમે તપાસ કરી તો જાણવા મળ્યું કે જીસીબી ની કામગીરી દરમિયાન કેબલ તૂટી ગયો છે.જેના લીધે જીસ્વાનથી ચાલતી ડ્રાઇવિંગની કામગીરી બંધ રહી હતી.
