સ્ટેશનરી, યુનિફોર્મના ભાવ વધતા વાલીઓ પર બોજ વધ્યો
પાટણ જિલ્લા સહિત સમગ્ર રાજ્યમાં 35 દિવસનાઉનાળુ વેકેશન આજ તા. 8 જૂન સોમવારથી શાળાઓમાં નવું શૈક્ષણિક સત્ર શરૂ થશે. આ સાથે જ પાટણ શહેરના બજારોમાં ચોપડા, નોટબુક અને સ્કૂલ યુનિફોર્મની ખરીદીનો ધમધમાટ શરૂ થયો છે.પાટણ જિલ્લાની શાળાઓમાં બે લાખથી વધુ વિદ્યાર્થીઓનો કોલાહલ આજથી ફરી ગુંજી ઉઠશે.
વિદ્યાર્થીઓ પણ શાળાએ જવા માટે ઉત્સાહભેર તૈયારીઓ પૂર્ણ કરી છે. જોકે, આ નવું શૈક્ષણિક વર્ષ પાટણ શહેર સહિત જિલ્લાના વાલીઓ માટે આર્થિક બોજ વધારનારું સાબિત થયુ છે.ગત વર્ષની સરખામણીએ ચાલુ વર્ષે સ્ટેશનરી સહિત સ્કૂલ યુનિફોર્મના ભાવમાં વધારો નોંધાયો છે. ખાનગી શાળાઓની ફીના કારણે વાલીઓ પહેલેથી જ આર્થિક બોજા તળે છે,ત્યારે આભાવવધારો તેમના ખિસ્સા પર વધુ દબાણ લાવશે.નોટબુકના ભાવમાં પણ વધારો જોવા મળ્યો છે, જ્યાં એક ડઝન નોટબુકના ભાવ 300 થી રૂ. 360 ના છે. ચોપડાના ભાવ રૂ. 240 થી રૂ. 840 પ્રતિ ડઝન છે. સ્ટેશનરીની અન્ય વસ્તુઓના ભાવમાં પણ વધારો થયો છે.
નવા શૈક્ષણિક સત્રમાં બાળકોના સ્કૂલ યુનિફોર્મ અને સ્કૂલ બેગ જેવી વસ્તુઓના ભાવમાં 20 ટકાનો વધારો થયો છે. ધો. 3 માં બે વિષય, ધો.6માં ત્રણ વિષય અને ધો.7 માં અંગ્રેજી પુસ્તક બદલાયું છે. આ ઉપરાંત, ધોરણ 11 આર્ટસ અને કોમર્સના ચોપડા બજારમાં ઉપલબ્ધ નથી, અને પ્લાસ્ટિકની વસ્તુઓના ભાવમાં પણ વધારો થયો છે. બુક સ્ટોલના માલિકે જણાવ્યું હતું કે નોટબુક અને ચોપડાના ભાવમાં વધારો થયો નથી પ્લાસ્ટિકની આઈટમ માં ભાવ વધારો થયો છે. બાળક માટે ચોપડા લેવા આવેલા વાલીએ જણાવ્યું કે તેમને ભાવ વધારો લાગ્યો છે. તેમણે ધોરણ 1ની ચોપડી, નોટબુક અને કંપાસ ખરીદ્યા, જેનું બિલ રૂ. 1500 થયું હોવાનું જણાવ્યું હતું.
