પુલ નીચે બ્રેઝા અને અલ્ટો વચ્ચે અકસ્માત, બંને વાહનોને નુકસાન; સદનસીબે મોટી જાનહાનિ ટળી
ડીસા તાલુકાના મુડેઠા ગામે નેશનલ હાઈવે-27 પર પુલ પર કામ ચાલી રહ્યું છે. કામની ધીમી ગતિના કારણે વાહનચાલકોને હાલાકીનો સામનો કરવો પડી રહ્યો છે. મુડેઠા પુલ નીચે વાહનવ્યવહાર માટે આપવામાં આવેલું ડાયવર્ઝન હાલ જોખમી બન્યું હોવાથી અકસ્માતનો ભય સતત સતાવી રહ્યો છે.
મુડેઠા પુલ નીચેના આ ડાયવર્ઝન પર તાજેતરમાં બ્રેઝા અને અલ્ટો કાર વચ્ચે અકસ્માત સર્જાયો હતો, જેમાં બંને વાહનોને નુકસાન થયું હતું. જોકે સદનસીબે આ અકસ્માતમાં કોઈ મોટી જાનહાનિ થઈ નહોતી. ઘટનાને પગલે ડાયવર્ઝનની સુરક્ષા વ્યવસ્થા સામે પણ સવાલો ઉઠ્યા છે. સ્થાનિકો અને વાહનચાલકોનું કહેવું છે કે ડાયવર્ઝન પર રસ્તાની હાલત સહિતની જરૂરી સુરક્ષા વ્યવસ્થા તાત્કાલિક સુધારવામાં આવે તો અકસ્માતનું જોખમ ઘટાડી શકાય છે. ખાસ કરીને રાત્રિના સમયે વાહનચાલકો માટે આ માર્ગ વધુ જોખમી બની શકે છે.
તેથી નેશનલ હાઈવે ઓથોરિટી દ્વારા તાત્કાલિક ધોરણે ડાયવર્ઝનનું સમારકામ કરી તેને સુરક્ષિત બનાવવામાં આવે તેમજ પુલ પર બાકી રહેલું કામ વહેલી તકે પૂર્ણ કરવામાં આવે, તેવી વાહનચાલકો અને સ્થાનિકોમાંથી માંગ ઉઠી છે.
