અમદાવાદથી દેલમાલ જતો પરિવાર ઇજાગ્રસ્ત બનતા સારવાર અર્થે ધારપુર હોસ્પિટલ ખસેડાયો
પાટણ જિલ્લાના મોઢેરા-મીઠી ધારીયાલ રોડ પર સાપને બચાવવા જતાં એક રિક્ષા ઝાડ સાથે અથડાઈ હતી. આ અકસ્માતમાં રિક્ષામાં સવાર મુસાફરોને ઈજા પહોંચી હતી. તેમને પ્રાથમિક સારવાર બાદ વધુ સારવાર માટે ધારપુર હોસ્પિટલમાં ખસેડવામાં આવ્યા હતા.
પ્રાપ્ત માહિતી અનુસાર, અમદાવાદનો એક ઠાકોર પરિવાર સવારે 9 વાગ્યાની આસપાસ દેલમાલ ગામે સામાજિક કામ અર્થે જઈ રહ્યો હતો. મોઢેરા-મીઠી ધારીયાલ રોડ પરથી પસાર થતી વખતે અચાનક એક સાપ રોડ વચ્ચે આડો ઉતર્યો હતો.સાપને બચાવવાના પ્રયાસમાં રિક્ષા ચાલકે વાહન પરનો કાબૂ ગુમાવ્યો હતો. રિક્ષા રોડની સાઈડમાં ઉતરી એક ઝાડ સાથે જોરદાર ટકરાઈ હતી.અકસ્માત થતાં આસપાસના ખેતરોમાં કામ કરતા ખેડૂતો તાત્કાલિક ઘટનાસ્થળે દોડી આવ્યા હતા. ખેડૂતોએ ઈજાગ્રસ્ત મુસાફરોને મેડિકલ વાન દ્વારા ચાણસ્મા આરોગ્ય કેન્દ્ર ખાતે પ્રાથમિક સારવાર માટે ખસેડ્યા હતા. ત્યાંથી વધુ સારવારની જરૂર જણાતા તેમને ધારપુર હોસ્પિટલમાં રીફર કરવામાં આવ્યા હોવાનું જાણવા મળ્યું છે.
