હડતાળને પગલે સરકારી કચેરીઓનું કામ ઠપ્પ: અરજદારો અટવાયા
14 પડતર માંગણીઓ મુદ્દે કર્મચારીઓનો મોરચો:બૃહદ બનાસકાંઠાના 700 કર્મીઓ જોડાયા
ગુજરાત રાજ્ય મહેસૂલી કર્મચારી મહામંડળ દ્વારા લાંબા સમયથી પડતર રહેલા સેવા વિષયક પ્રશ્નોના નિરાકરણની માંગ સાથે શરૂ કરાયેલ તબક્કાવાર આંદોલન હવે અચોક્કસ મુદતની હડતાળમાં ફેરવાયું છે. 5 ઓક્ટોબરે સામૂહિક રજા બાદ પણ પ્રશ્નોનું નક્કર નિરાકરણ ન આવતા 7 ઓક્ટોબરથી મહેસૂલી કર્મચારીઓએ અચોક્કસ મુદતની હડતાળનું શસ્ત્ર ઉગામ્યુ છે. જેના પગલે બનાસકાંઠા તેમજ વાવ-થરાદ જિલ્લાના વિવિધ તાલુકાઓમાં મહેસૂલી કામગીરી પર અસર જોવા મળી રહી છે.
કર્મચારી સંગઠનનો સ્પષ્ટ સંકેત છે કે, પડતર પ્રશ્નોનું હકારાત્મક નિરાકરણ ન આવે ત્યાં સુધી આંદોલન ચાલુ રાખવામાં આવશે. જેને લઈને આવનારા દિવસોમાં સરકારી કચેરીઓમાં મહેસુલી કામગીરી ઠપ્પ થવાની સાથે અરજદારો અટવાઈ જશે તેવી શક્યતાઓ વચ્ચે સરકાર શું રૂખ અપનાવે છે તે જોવું રહ્યું..!
