ખેડબ્રહ્મા તાલુકામાં મહેસૂલ વિભાગના કર્મચારીઓ દ્વારા પોતાની લાંબા સમયથી પડતર રહેલી વિવિધ માંગણીઓને લઈને સરકાર સામે ઉગ્ર વિરોધ શરૂ કરવામાં આવ્યો છે. સરકાર દ્વારા યોગ્ય નિકાલ ન લાવવામાં આવતા કર્મચારીઓમાં ભારે રોષ જોવા મળી રહ્યો છે, જેના ભાગરૂપે ૩૩ જેટલા કર્મચારીઓએ કાળી પટ્ટી ધારણ કરી કામગીરી કરી હતી અને વિરોધના પ્રતીકરૂપે સરકારી વોટ્સએપ ગ્રુપો પણ છોડી દીધા હતા.
આ આંદોલનને વધુ વેગ આપવા માટે કર્મચારીઓ દ્વારા આગામી દિવસોમાં માસ સીએલ (Mass CL) પર ઉતરવાની તેમજ હડતાળ પાડવાની ચીમકી પણ ઉચ્ચારવામાં આવી છે. મહેસૂલ કર્મચારીઓની આ ચિમકીના પગલે વહીવટી તંત્રમાં પણ હલચલ મચી ગઈ છે, કારણ કે જો આ કર્મચારીઓ હડતાળ પર જશે તો નાગરિકોના રોજિંદા દાખલા, જમીન અને રેવન્યુને લગતા મહત્વપૂર્ણ કામો ઠપ થઈ જવાની પૂરી સંભાવના છે. કર્મચારીઓએ ચીમકી આપી છે કે જો વહેલી તકે ન્યાયિક ઉકેલ નહીં આવે તો ઉગ્ર આંદોલન કરવામાં આવશે.
