પાલનપુરની જિલ્લા જેલમાં રક્ષાબંધનની કરાઈ ઉજવણી બહેનોએ રાખડી બાંધતા સર્જાયા લાગણીસભર દ્રશ્યો

ભાઈ બહેનના સ્નેહના પ્રતિક સમા પવિત્ર રક્ષાબંધન પર્વની આજે પાલનપુરની જીલ્લા જેલ ખાતે ઉજવણી કરવામાં આવી હતી. જેમાં બહેનોએ કેદીઓને રાખડી બાંધતા લાગણીસભર દ્રશ્યો જોવા મળ્યા હતા. સમગ્ર દેશમાં આજે ભાઈ બહેનના સ્નેહના પ્રતિક સમા પવિત્ર તહેવાર એવા રક્ષાબંધન પર્વની ધામધુમપુર્વક ઉજવણી કરવામાં આવે છે. જેમાં બહેન ભાઈની રક્ષા માટે ભાઈના હાથે રાખડી બાંધી તેની રક્ષા માટે ની પ્રાર્થના કરતી હોય છે. જેને લઈ આજે પાલનપુર ખાતે આવેલ જીલ્લા જેલ ખાતે જેલમાં સજા ભોગવતા કેદીઓ માટે પણ રક્ષાબંધન પર્વનું આયોજન કરવામાં આવ્યુ હતું. જેમાં જેલમાં સજા કાપતા કેદીઓને પોતાની બહેનો દ્વારા રાખડી બાંધી મો મીઠું કરાવીને રક્ષાબંધન પર્વની ઉજવણી કરાઈ હતી. જ્યારે જે કેદીઓની બહેનો આવી શકી નથી તે કેદી ભાઈઓ અને જેલના સ્ટાફને બ્રહ્માકુમારી બહેનો સહિતની સંસ્થાઓ દ્વારા રાખડી બાંધવામાં આવી હતી. જેમાં પર્યાવરણની રક્ષાનો સંદેશો આપતા ભાઈઓ દ્વારા બહેનોને છોડ આપ્યા હતા. જે છોડ વાવી બહેનો તેનું જતન કરી ગ્લોબલ વોર્મિંગની સમસ્યા સામે પોતાનું યોગદાન આપશે તેવું જિલ્લા જેલ અધિક્ષક વી.પી.ગોહિલે જણાવ્યું હતું. જેલમાં સજા કાપતા કેદીઓ પણ સામાજિક તાંતણે બંધાઈ રહે અને સમાજમાં તેઓનું પુનઃ સ્થાપન થઈ શકે તે માટે જેલમાં પણ રાષ્ટ્રીય અને સામાજિક તહેવારોની ઉજવણી થતી હોય છે.