ગાર્ડ ઓફ ઓનર સાથે મૃતકને અંતિમ વિદાય અપાઈ
સુરેન્દ્રનગર જિલ્લાના પાટડી તાલુકાના કઠાડા ગામ પાસે કાર અને ટ્રેલર વચ્ચે સર્જાયેલા ગંભીર અકસ્માતમાં ઈજાગ્રસ્ત બનેલ રાધનપુર PSI નું સારવાર દરમિયાન મોત નિપજતા મૃતકને ગાર્ડ ઓફ ઓનર સાથે અંતિમ વિદાય અપાઈ છે. રાધનપુરમાં પીએસઆઈ તરીકે ફરજ બજાવતા હયાતખાન હુસેનખાન મલેકે અમદાવાદની હોસ્પિટલમાં સારવાર દરમિયાન અંતિમ શ્વાસ લીધા હતા.તેમના પાર્થિવ દેહને વતન ખેરવા ગામે સંપૂર્ણ રાજકીય અને રાષ્ટ્રીય સન્માન સાથે ગાર્ડ ઓફ ઓનર આપી અંતિમ વિદાય આપવામાં આવી હતી.
મળતી માહિતી મુજબ, દસાડા તાલુકાના ઝેઝરી ગામેથી સવા મહિનાની ઝીયારત પૂર્ણ કરીને વારાહી પરત ફરી રહેલા પરિવારની કાર પાટડીના કઠાડા ગામ નજીક ટ્રેલર સાથે અથડાઈ હતી. અકસ્માત એટલો ભયાનક હતો કે નિવૃત્ત નાયબ મામલતદાર એમદખાન અલીખાન મલેકનું ઘટના સ્થળે જ મોત નીપજ્યું હતું. રવિવારે સારવાર દરમિયાન PSI હયાતખાન મલેકનું પણ નિધન થતાં તેઓના પાર્થિવ દેહને ગાર્ડ ઓફ ઓનર સાથે અંતિમ વિદાય અપાઈ હતી.
