ડીસા શહેરના ઐતિહાસિક હવાઈ પિલ્લર મેદાનમાં બની રહેલા અર્બન હાટની દીવાલના નિર્માણને લઈને સ્થાનિક રહીશોમાં ભારે આક્રોશ જોવા મળી રહ્યો છે. ૧૮ મીટરના જાહેર રસ્તાની બિલકુલ વચ્ચે આ દીવાલનું કામકાજ ચાલી રહ્યું હોવાથી ટ્રાફિક અને અવરજવરની મોટી સમસ્યા સર્જાવાની ભીતિ સાથે સ્થાનિકોએ વિરોધનો સૂર ઉઠાવ્યો છે. આજે શનિવારે આ વિરોધે ધાર્મિક સ્વરૂપ ધારણ કર્યું હતું, જ્યાં લોકોએ અનોખી રીતે પોતાનો વિરોધ નોંધાવ્યો હતો.
હવાઈ પિલ્લર મેદાન ખાતે એકઠા થયેલા સ્થાનિક નાગરિકોએ ચાલુ કામ બંધ કરાવી દીધું હતું. ત્યારબાદ સમગ્ર વિસ્તારમાં ભક્તિમય માહોલ ઊભો કરી, સત્તાધીશો અને વહીવટી તંત્રને સદબુદ્ધિ મળે તે માટે સામૂહિક હનુમાન ચાલીસાના પાઠ કર્યા હતા. આ વિરોધ પ્રદર્શનમાં આશ્ચર્યજનક રીતે ડીસા ભારતીય જનતા પાર્ટીના સ્થાનિક કાર્યકર્તાઓ પણ જોડાયા હતા અને લોકોની માંગને સમર્થન આપ્યું હતું.સ્થાનિકોના જણાવ્યા અનુસાર ૧૮ મીટરના રસ્તાની અધવચ્ચે દીવાલ ચણી દેવાથી ભવિષ્યમાં અહીંથી પસાર થવું મુશ્કેલ બની જશે. તંત્રએ વિકાસ જરૂર કરવો જોઈએ, પરંતુ આયોજનપૂર્વક. અમારી માંગ છે કે અર્બન હાટ માટેની આ જગ્યા તાત્કાલિક બદલવામાં આવે જેથી જાહેર રસ્તો ખુલ્લો રહી શકે.
હાલ પૂરતું સ્થાનિકો અને અગ્રણીઓના આક્રોશને જોતા સ્થળ પર કામગીરી અટકાવી દેવામાં આવી છે. હવે જોવાનું એ રહેશે કે શાસકો અને તંત્ર જનતાની આ વાજબી માંગણી સ્વીકારીને અર્બન હાટની જગ્યા બદલે છે કે પછી વિવાદ વધુ વકરે છે ? તે જોવું રહ્યું.
