સાબરકાંઠા જિલ્લાના ઇડર ખાતે શહેર અને તાલુકા કોંગ્રેસ સમિતિ દ્વારા "લોકશાહી બચાવો સપ્તાહ" અંતર્ગત સરકાર સામે ઉગ્ર વિરોધ પ્રદર્શન કરવામાં આવ્યું હતું. મુખ્ય ચૂંટણી કમિશનર જ્ઞાનેશકુમાર દ્વારા આચરવામાં આવેલી કથિત 'વોટ ચોરી' અને તેના કારણે દેશના ૧૩ કરોડ નાગરિકોને મતાધિકારથી વંચિત રાખવાના વિરોધમાં આ આંદોલન ચલાવવામાં આવી રહ્યું છે.
જિલ્લા કોંગ્રેસ પ્રમુખ રામભાઈ સોલંકીની આગેવાની હેઠળ કોંગ્રેસના કાર્યકરો મોટી સંખ્યામાં આરામગૃહ ખાતે એકત્ર થયા હતા. ત્યારબાદ "મુખ્ય ચૂંટણી કમિશનર જ્ઞાનેશકુમાર રાજીનામું આપો" ના નારાઓ અને જોરદાર સૂત્રોચ્ચાર સાથે આ રેલી તિરંગા સર્કલ થઈને સીધી પ્રાંત કચેરી ખાતે પહોંચી હતી. કોંગ્રેસના અગ્રણીઓએ રજૂઆત કરી હતી કે વોટનો અધિકાર એ દેશના નાગરિકોનો મૂળભૂત અધિકાર છે, જેને છીનવવાનો કોઈને હક નથી. આ ગંભીર બાબતે રાષ્ટ્રપતિ સુધી રજૂઆત પહોંચાડવા અને યોગ્ય ન્યાય મેળવવા માટે ઇડર પ્રાંત અધિકારીને આવેદનપત્ર પાઠવવામાં આવ્યું હતું.
આ રોષપૂર્ણ રેલી અને આવેદનપત્ર આપવાના કાર્યક્રમમાં જિલ્લા કોંગ્રેસ પ્રમુખ રામભાઈ સોલંકી, તાલુકા પ્રમુખ નંદુભાઈ પટેલ, શહેર પ્રમુખ જીતુભાઈ પંચાલ, પ્રભારી અશોકભાઈ પટેલ, પૂર્વ તાલુકા પંચાયત પ્રમુખ એકતાબેન પટેલ, અશોકભાઈ પટેલ (માજી પ્રમુખ), મુકેશભાઈ પરમાર, ઇસ્માઈલભાઈ સહિત તાલુકા પંચાયતના માજી પ્રમુખો, સદસ્યો, વિરોધ પક્ષના નેતાઓ તેમજ મોટી સંખ્યામાં કોંગ્રેસ પક્ષના આગેવાનો અને કાર્યકરો ઉપસ્થિત રહ્યા હતા.
