સુધા અને જાલોઢા ફીડર જોડવાની માંગ સાથે ગ્રામજનોમાં રોષ, સાત દિવસમાં ઉકેલ નહીં આવે તો આંદોલનની ચીમકી
વાવ-થરાદ જિલ્લાના લાખણી તાલુકાના વાસણા (વાતમ) ગામે ઓછા વોલ્ટેજ અને વારંવાર વીજ ફોલ્ટની સમસ્યાને લઈને ગ્રામજનોમાં રોષ જોવા મળી રહ્યો છે. વિસ્તારની લાંબા સમયથી ચાલી આવતી વીજ સમસ્યાના નિરાકરણ માટે સરકાર દ્વારા વાસણા ખાતે 66 KV સબ સ્ટેશન મંજૂર કરવામાં આવ્યું હતું. સબ સ્ટેશન શરૂ થયાને બે-ત્રણ મહિના થવા આવ્યા હોવા છતાં સુધા અને જાલોઢા ફીડરને તેની સાથે જોડવામાં આવ્યા નથી, જેના કારણે ગ્રામજનોમાં અસંતોષ ફેલાયો છે.
ગ્રામજનોના જણાવ્યા મુજબ, સુધા ફીડર હાલ વાતમ ફીડર પરથી લાંબી વીજ લાઈન મારફતે સંચાલિત થાય છે. લાંબી લાઈનના કારણે ખાસ કરીને ચોમાસા દરમિયાન વારંવાર ફોલ્ટ સર્જાતા વીજ પુરવઠો ખોરવાય છે. સાંજના સમયે વીજળી બંધ થવાથી ઘરવપરાશના કામકાજ ઉપરાંત બાળકોના અભ્યાસ અને ખેડૂતોના ખેતીકામને પણ અસર થઈ રહી છે. ઓછા વોલ્ટેજની સમસ્યાના કારણે ખેડૂતોને પણ મુશ્કેલીનો સામનો કરવો પડે છે.
આ અંગે ગ્રામજનો દ્વારા લાખણી વિદ્યુત તંત્ર સમક્ષ વારંવાર ટેલિફોનિક અને મૌખિક રજૂઆતો કરવામાં આવી હોવાનું જણાવાયું છે. તેમ છતાં સમસ્યાનું કાયમી નિરાકરણ ન આવતા તંત્રની કામગીરી સામે સવાલો ઉઠી રહ્યા છે. 66 KV સબ સ્ટેશન કાર્યરત હોવા છતાં નજીકના ફીડરોને તેની સાથે જોડવામાં વિલંબ કેમ થઈ રહ્યો છે તે અંગે ગ્રામજનો સ્પષ્ટતા અને તાત્કાલિક કાર્યવાહી ઈચ્છી રહ્યા છે.
ગ્રામજનોની મુખ્ય માંગ છે કે વાસણા 66 KV સબ સ્ટેશનમાંથી સુધા અને જાલોઢા ફીડરને તાત્કાલિક જોડવામાં આવે, જેથી વીજ લાઈનનો ભાર ઘટે અને વારંવાર સર્જાતા ફોલ્ટ તથા ઓછા વોલ્ટેજની સમસ્યામાંથી રાહત મળે. ગ્રામજનોના જણાવ્યા મુજબ, આગામી સાત દિવસમાં સમસ્યાનો ઉકેલ નહીં આવે તો ગાંધી ચીંધ્યા માર્ગે આંદોલન કરવાની ચીમકી આપવામાં આવી છે.
