પ્રમુખે આરોપો નકારી રૂ. 24 લાખના આયોજનના પુરાવા હોવાનો દાવો કર્યો
પાટણ જિલ્લા પંચાયતની ખાસ સામન્ય સભા બોલાવવા અને વિકાસ કામોની ગ્રાન્ટ ફાળવણી મુદ્દે સત્તાપક્ષ અને વિપક્ષ સામ સામે આવી ગયા હતા. કોંગ્રેસ સદસ્યોએ ભેદભાવ અને નિયમોના ઉલ્લંઘનનો આરોપ લગાવી વિરોધ નોંધાવ્યો, જ્યારે પ્રમુખે આરોપોને પાયાવિહોણા ગણાવ્યા હતાં.
નેદરા બેઠકના સદસ્ય દેસાઈ વિષ્ણુકુમાર ફુલાજીએ આક્ષેપ કર્યો કે ભાજપના વોટ્સએપ ગ્રૂપમાં 25 લાખ અને કોંગ્રેસના ગ્રૂપમાં 12 લાખનું આયોજન મૂકી ભેદભાવ કરાયો. વિપક્ષે સભા અધૂરી છોડી કમિશનરમાં રજૂઆત અને ધરણાં કરવાની ચીમકી આપી હતી. ધારપુરના સદસ્ય ઠાકોર અજીતસિંહે પ્રમુખ અને DDO સભા છોડી ગયાનો આરોપ લગાવ્યો.જિલ્લા પંચાયત પ્રમુખ ભાવિક પટેલે કોંગ્રેસના 24 લાખના કામોના આયોજનના પુરાવા હોવાનો દાવો કર્યો. તેમણે સ્પષ્ટતા કરી કે સમયના અભાવે ખાસ સભા બોલાવાઈ હતી અને તેનો એજન્ડા 7 દિવસ પહેલાં જ મોકલી દેવાયો હતો. પ્રમુખે સભા અધૂરી છોડવાના આરોપને પણ નકારી કાઢ્યો હતો.
