પાટણના ભગવતી ટ્રેડર્સના ત્રીજા માળે આગ લાગતાં અફરાતફરી મચી

ફાયર બ્રિગેડ ટીમે પાણીનો મારો ચલાવી આગ પર કાબૂ મેળવતાં મોટી હોનારત ટાળી

પાટણ શહેરના દોશીવટ બજાર નાકે આવેલી ભગવતી ટ્રેડર્સ નામની દુકાનના ત્રીજા માળે અગમ્ય કારણોસર આગ લાગી હતી. આ ઘટનાને કારણે આસપાસના વિસ્તારમાં દોડધામ મચી ગઈ હતી.આગની જાણ થતાં જ પાટણ નગરપાલિકાની ફાયર બ્રિગેડની ટીમ તાત્કાલિક ઘટના સ્થળે પહોંચી હતી. ફાયર વિભાગે ઝડપથી કાર્યવાહી કરીને આગ પર કાબૂ મેળવ્યો હતો.

ભગવતી ટ્રેડર્સના ત્રીજા માળેથી ધુમાડાના ગોટેગોટા નીકળતા જોઈ સ્થાનિક વેપારીઓ અને રાહદારીઓમાં ચિંતા ફેલાઈ હતી. સમયસર ફાયર બ્રિગેડની કામગીરીથી મોટી નુકસાની ટળી હતી. આગ લાગવાનું કારણ જાણવા વધુ તપાસ ચાલી રહી હોવાનું જાણવા મળ્યું છે.