વિજયનગર તાલુકાના દઢવાવ ગામે આવેલા મહુવા અને મીઠડી ફળિયાના રહીશો માટે પાકો રસ્તો બનાવવા દઢવાવ ગ્રામ પંચાયતના સરપંચ ચંદ્રિકાબેન લલિતભાઈ ડામોર દ્વારા માર્ગ અને મકાન પંચાયત પેટા વિભાગ, વિજયનગરને લેખિત રજૂઆત કરવામાં આવી છે. દઢવાવ-લીમડા ડામર મેઈન રોડથી આશરે ૧૨૦૦ મીટર અંતરે આવેલા આ ફળિયાઓમાં જવા માટે પાકો રસ્તો ન હોવાથી સ્થાનિક ૬૦ થી ૭૦ ઘરોના રહીશોને અવરજવરમાં ભારે હાલાકીનો સામનો કરવો પડી રહ્યો છે.
ખાસ કરીને ચોમાસા દરમિયાન મેડિકલ ઈમરજન્સીના સમયે એમ્બ્યુલન્સ કે અન્ય વાહનો આવી શકતા ન હોવાથી દર્દીઓને સમયસર સારવાર મળવામાં મુશ્કેલી પડે છે, તેમજ બાળકોને શાળાએ જવામાં પણ ભારે અગવડ વેઠવી પડે છે. જો આ ૧૨૦૦ મીટરનો ડામર રોડ તાત્કાલિક મંજૂર કરવામાં આવે તો ગ્રામજનોને વિજયનગર શહેર સાથે જોડાણ મળશે અને શિક્ષણ તથા આરોગ્યલક્ષી સુવિધાઓ સરળતાથી ઉપલબ્ધ બનશે, જેથી તંત્ર દ્વારા વહેલી તકે કામગીરી હાથ ધરવામાં આવે તેવી લોકમાંગ ઉઠી છે.
