બનાસકાંઠા જિલ્લાના પાલનપુર શહેરમાં આવેલા એક શો-રૂમમાં થયેલી ચોરીના ગુનાનો ભેદ પાલનપુર શહેર પશ્ચિમ પોલીસે ઉકેલી કાઢ્યો છે. પોલીસ દ્વારા ચોરીના ગુનામાં સંડોવાયેલા એક આરોપીની ધરપકડ કરી તેની પાસેથી રોકડ રકમ સહિતનો મુદ્દામાલ કબજે કરવામાં આવ્યો છે.
પ્રાપ્ત વિગતો અનુસાર પાલનપુર -અમદાવાદ હાઇવે પર આવેલા તન્નુ શો-રૂમમાં તાળા તોડી તિજોરીમાંથી રૂ. 1,58,000ની રોકડ રકમની ચોરી કરવામાં આવી હતી. આ બનાવ અંગે પાલનપુર શહેર પશ્ચિમ પોલીસ મથકે ફરિયાદ નોંધાઈ હતી.ફરિયાદના આધારે પોલીસે તપાસ હાથ ધરી હતી. તપાસ દરમિયાન બે શખ્સોએ શો-રૂમમાં ઘુસી ચોરી આચરી હોવાનું સામે આવ્યું હતું. પોલીસે ટેકનિકલ અને હ્યુમન સર્વેલન્સના આધારે તપાસ કરતા અમદાવાદના આણંદ વિસ્તારમાંથી આરોપી ધનસિંહ રાજપૂતને ઝડપી પાડ્યો હતો.
પોલીસે આરોપીની પૂછપરછ દરમિયાન તેની પાસેથી રૂ. 99,500નો મુદ્દામાલ કબજે કર્યો છે. જ્યારે ચોરીના ગુનામાં સંડોવાયેલા અન્ય આરોપી વિક્રમ ગૌસ્વામીની શોધખોળ હાલ ચાલુ રાખવામાં આવી છે. પાલનપુર શહેર પશ્ચિમ પોલીસ દ્વારા આગળની કાયદેસરની કાર્યવાહી હાથ ધરવામાં આવી છે.
