ધાનેરાના અનડિટેક્ટ વાહન ચોરીના ગુનાનો ભેદ ઉકેલાયો
બનાસકાંઠા લોકલ ક્રાઈમ બ્રાન્ચ (એલસીબી) ની ટીમે કોમ્બિંગ નાઈટ દરમિયાન કાંકરેજ તાલુકાના શિહોરી વિસ્તારમાં વાહન ચેકિંગ કરી ચોરીના બાઈક સાથે એક શખ્સને ઝડપી પાડ્યો છે. આ કાર્યવાહીથી ધાનેરા પોલીસ મથકમાં નોંધાયેલા અનડિટેક્ટ વાહન ચોરીના ગુનાનો પણ ભેદ ઉકેલાયો છે.
એલસીબી ટીમ ખેમાણા નેશનલ હાઈવે પર નાળા પાસે વાહન ચેકિંગ કરી રહી હતી. દરમિયાન નંબર પ્લેટ વગરની હિરો હોન્ડા સ્પ્લેન્ડર શંકાસ્પદ હાલતમાં મળી આવતા પોલીસે તપાસ કરી હતી. તપાસમાં બાઈકનો રજીસ્ટ્રેશન નંબર જીજે-08-એસ-5707 અને કિંમત અંદાજે રૂ.15 હજાર હોવાનું તેમજ બાઈક થાવર ગૌશાળા પાસેથી ચોરાયું હોવાનું બહાર આવ્યું હતું.
પોલીસે બાઈક સાથે ડીસા તાલુકાના મોટી આખોલ ગામના પ્રવિણસિંહ દોલસિંહ ખાંટને ઝડપી પાડ્યો છે. ચોરી અંગે ધાનેરા પોલીસ મથકે નોંધાયેલા ગુનામાં આરોપી સામે કાયદેસરની કાર્યવાહી હાથ ધરવામાં આવી છે.
